Liivimik toqutsisoqarnerata kingorna tammajuitsussarsiniarluni piniartarneq inerteqqutaaleriaannaavoq
Afrikami tammajuitsussarsiniarluni piniartarneq inerteqqutaalerpat tassangaaniillu isertitsissutigineqartartut annaaneqarpata, nunalerinermit aningaasarsiorneq periarfissaasariaqassaaq, inuussutissarsiutigalugu tammajuitsussarsiniarluni piniartoq qallunaaq ernumalluni taama oqarpoq.
Pisuut pinnguarput
Tammajuitsussarsiniarluni Afrikami piniartarnerup oqallisigineqarnera aallartippoq , kigutit nakorsaat amerikamioq juulip ulluisa arfernganni liiveq Zimbabwemi tusaamasaallunilu nuannareqaqisoq Cecil unioqqutitsilluni toqussimammagu.
Uumasut pisinnaatitaaffiinik suliniuteqartoq suliniaqatigiiffik Peta isumaqarpoq, tammajuitsussarsiniarluni piniarsinnaatitaaneq piaartumik inerteqqutaalersinneqartariaqartoq, aliikkutaralugu piniarneq kusanaatsutut taallugu, pisoorsuarnit paasinnissinnaanngitsunit misigissuseqanngitsunillu pissanganartorsiorniarluni piniarnertut taallugu.
Afrikami aningaasarsiutaalluarpoq
Tammajuitsussarsiniarluni Afrikami piniartarneq Afrikami aningaasarsiutaalluarpoq, tammajuitsussarsiniarlutik piniariat ukiut tamaasa tusintinik amerlatigisut afrikaliartarput afrikami uumasut angisuut pisarinissaannut neriuuteqarlutik.
Tammajuitsussarsiniarlutik piniariat afrikami aningaasat atortagaat afrikamiunut pingaaruteqarput, piniariartoqanngippat aningaasatigut isertitsissutigineqarsinnaasut allanit nassaarineqartariaqassapput.
Inuussutissarsiutigalugu tammajuitsussarsiniarluni piniartoq atuakkiortorlu qallunaaq Natasha Illum Berg enumassuteqarpoq, tammajuitsussarniarluni piniartarneq inerteqqutaalerpat
- Aningaasat suminngaanit pissarsiarineqassagamik ? Nunaminertarujussuit nunalilerinermut atorneqassappat ?
Nunalerineq annertusineqarpat uumasut liivit allallu ukiut 20it qaangiuppata tammassapput, nujuartanillu uumasuerulluni, Natasha Illum Berg erumalluni taama oqarpoq.
Taassuma aalajangiusimallugu oqaatigivaa illersorneqarsinnaasumik piniartoqartillugu - uumasunik piniartarneq ajunngitsuusoq.