Lektori: Atornerluisuusoqannginneranik takutitsiniarneruvoq
Københavnip Universitetiani lektori, Lars Hovbakke Sørensen, Kalaallit Nunaanni pissutsinik ilisimasaqarluartoq isumaqarpoq, Inatsisartunut ilaasortat quuisa misissorneqartalernissaanik Naalakkersuisooqatigiit kissaateqarnerminni anguniagariinnaraat, politikerit sunilluunniit atornerluisannginnissaannik anguniagaqarneq, soorlu aamma imerpallaarnerarneqartarnerannik ikiaroornartunillu atuisarnerannik tusaamaneqaatit qaangerniarlugit taama iliuuseqartutullusooq isigineqarsinnaasut.
AAMMA ATUARUK Qinigassanngortittut quumik misissortinnissaa ajoriffissaqartinngilaat
- Kalaallit Nunaanni politikki eqqarsaatigalugu aallaqqaataaniillusooq aallartittoqartariaqarneranik Naalakkersuisooqatigiilersut anguniagaqarnerannut, quunik misissuisalernissaq ilaatiinnarneqartutullusooq isikkoqarpoq, Lars Hovbakke Sørensen Danmarks Radioamut oqarpoq.
Qineqqusaarnerup nalaanni partiit anginerit qiningassanngortitaasa ilaannit oqaatigineqarpoq, pissaanermik atornerluineq aningaasanillu atornerluineq qiningaassagunik akiorniarlugu.
Atornerluinerit unitsinnissaannik kissaateqarneq
Qinigassanngortittut ilaat taama oqarput, Naalakkersuisut siulittaasorisimasaata, Aleqa Hammondip Nunatta aningaasaataanik, 106.000 koruuninik atornerluisimanera kikkunnut tamanut nalunaarutigineqariitsiaannartorlu.
Tamannalu tunngavilugu, atornerluinerit oqaluttuaannanngortinneqarnissaannik kissaateqarneq Naalakkersuisooqatigiilersunit anguniarneqalerpoq.
AAMMA ATUARUK Naalakkersuisooqatigiit quunik misissuisarnissamik piumasaqaataat nalunartoqartoq
- Naalakkersuisooqatigiilersunit atornerluinerit tamarluinnaasa, soorlu aamma ikiaroornartunik atornerluinerit qimanneqarnissaat kissaataalerpoq, oqarlutillusooq taamaattut tamarluinnaasa akuerisinnaannginnamikkit qanoq iliuuseqartariaqalerlutik, Københavnip Universitetiani lektori, Lars Hovbakke Sørensen Danmarks Radioamut taama oqarpoq.