Folketingimut qinersieq 2015 Lars Løkke isumaqatiginninniartussanngorpoq
Venstret siulittaasuata Lars Løkke Rasmussenip ullormi unnuamilu tulliuttumi Danmarkimi naalakkersuisunngortitsiniarluni isumaqatigiinniarnernik aallartitsinissaa ilungersunartussaassaaq. Danmarkimi tusagassiorfiit amerlasuut taama nalunaaruteqarput.
Lars Løkke Rasmussenip Danmarkimi talerperliit Folketingimi qinersinermi ajugaanerat ippassaq unnukkut nalunaarutigaa. Talerperliit 90-inik ilaasortaatitaqalermata saamerliillu 85-inik ilaasortaatitaqalerlutik, Løkke naalakkersuisunngortitsiniarluni isumaqatigiinniarnernut siuttuusussanngorpoq, tamannali ilungersunartussaassaaq.
Tassami Venstret ilaasortaatitaat 13-inik ikileriarput, Dansk Folkepartiikkulli amerleriarujussuarlutik ilaasortaatitatik 15-inik ilammata Danmarkimi partiit annersaannut tullinngorput. Partiilli taassuma naalakkersuisunngortitsinermi peqataarusunnerluni erseqqarissumik suli nalunaarutiginngilaa, taamaalillunilu partiit sorliit Danmarkimi naalakkersuisunngortitseqataassanersut suli nalunarallarluni.
Dansk Folkepartiilli siulittaasuata Kristian Thulesen Dahlip neriorsuutigereerpaa - partiini annerpaamut tullinngoraluartoq - ministeriuninngornissani kissaatiginagu, Løkkelli ministeriuninngornissaa suli tapersersorini.
Dronning Margrethep partiit folketingimiittut tamaasa maani nalunaaqutarput naapertorlugu - massakkut - nalunaaqutaq qulinut, ministeriuninngortussatut piukkussaanik oqaloqatiginiarlugit aggersarpai.
Helle Thorning-Schmidtip ministeriunertut tunuarnini dronningimut ullumi siusinnerusukkut nalunaarutigereeraalu tamanna pissaaq.
Partiit dronningimik oqaloqateqariartornerminni tamarmik immikkut marlunnik peqataatitaqassapput, taakkulu naalakkersuisunngortitsiniarluni isumaqatigiinniarnissani siuttuusussatut kissaatigisartik nalunaarutigissavaat. Venstret siulittaasuata Lars Løkke Rasmussenip taama suliakkerneqarnissaa naatsorsuutigineqarpoq.