Nakorsaaneq: Uninngasinnaasut killeqanngillat sulisussalli killeqarput

Covid-19-imik tunillatsissimasunik marlunnik Dronning Ingriup Napparsimmavissuani maanna uninngasoqarpoq, peqqinnissaqarfitta tamanna aqussinnaavaa, qanorli amerlatigisut amerlavallaassappat?

- Aalajangersimasumik killeqanngilaq, pissutsit piffissami qanoq ikkumaarnerat apeqqutaassaaq. Kalaallit peqqinnissaqarfiini sulisussaqarniarneq killeqartuuvoq, allanngorartuullunilu, Henrik L. Hansen KNR-imut oqarpoq.

Taamaammat covid-19-imik napparsimasut qanoq amerlatigisut uninngasuuteqarsinnaanissinnut killeqanngilaq? Assersuutigalugu 20-nik uninngaasuteqarsinnaavisi?

- 20-nik piffissami sivikitsumi uninngasuuteqartoqarsinnaanissaa takorloorsinnaavara, tassanili napparsimasut qanoq napparsimarulutsiginerat apeqqutaassaaq.

- Pissutigalugu covid-19-imik napparsimaruluttut passunneqaannaavittussaanerat pissutigalugu isumalluutinik atuingaatsiartoqartussaavoq, napparsimasulli annikitsuinnarmik ersiuteqartut assertuutigalugu iltilersorneqarnissaminnik taamaallaat pisariaqartitsisut amerlanerusut isumagineqarsinnaapput.

Nunatsinni peqqinnissaqarfinnut ajutoorutaasumik nammakkersorneqarpallaalissagaluarunik qanoq iliortoqassava?

- Nunatsinni peqqinnissaqarfinni passunneqarsinnaanngitsunik napparsimasoqalissagaluarpat taakku Danmarkiliartinneqartarnissaanut isumaqatigiissuteqartuaannarpoq, tamanna covid-imik nunarsuaq tamakkerlugu tunillaassuuttoqarnerani aamma atuuppoq.

- Taamaammat pisariaqartitsisoqalernerani danskit peqqinnissaqarfii sillimmatitut atorneqassapput.

 Nunatsinni anersaartuutinik qassinik atorneqarsinnaasoqarpa?

- Amerlalaartorujussuupput, uanili tamanna aporfiunngilaq. Sulisunilli anersaartuutinik isumaginnissinnaasoqarnera ajornartorsiutaalluni.

AAMMA ATUARUK Endnu en indlagt med coronavirus

- Peruluttut uninngavianni inissat sisamaapput, taakkuli tunngaviusumik amerlineqarsinnaapput. Tassani atortorsiissaarutinik amigaateqartoqangaatsiarnavianngilaq, sulisussalli amigaatigineqassallutik, nakorsaaneq oqarpoq.

Tunillatsissimanerup kingorna malunniutaasut

Covid-19-imik tunillatsissimasut naamasaataarussinnaallutillu susunnimut malussarissutaarussinnaasut nalunaarutigineqartarpoq, kisianni virusip nutaap sunniutigisinnaasai ajornakusoorsinnaallutillu aalajangersarnissaat piffissamik atuiffiusinnaapput.

- Coronamik tunillatsissimanermik sunniutit taakku uppernarsarluarneqarnikuusinnaapput. Assersuutigalugu naamasaataarunneq susunnissunnittunillu malussarinniutaarunneq, taakkuli piffissap ingerlanerani amerlanerpaanut uteqqittarput.

- Taamaammat assigiinngitsunik allanik sunniuteqartoqarsinnaavoq, tassa assigiinngitsunik kinguneqartitsinerit, aamma piffissamut ungasinnerusumut sunniuteqarnerit assersuutigalugu qasoqqaneq.

- Kisianni tamanna piffissami matumani immikkut ittumik paasineqarluarnikuunngilaq. Tamanna pillugu paasisat naammanngillat, Henrik L. Hansen KNR-imut oqarpoq.