Siunnersuisoqatigiit arnanut nersualaarinnittut
Inuit Pisinnaatitaaffii pillugit Siunnersuisoqatigiit arnanut sisamanut kannguttaatsuliorfigineqarsimallutik unnerluussisunut nersualaaripput.
- Ataatsimut isiginnilluta una oqariartuutigaarput: Arnat suliamik taama imaannaanngitsigisumik ajornaatsuinnaanngitsigisumillu qaqitsisimanerannut nersualaarusuppagut, siulittaasoq, Sara Olsvig, KNR-imut oqarpoq.
Naalakkersuinermi qitiusumik ukiuni 38-ni inissisimasimasoq, Mikael Petersen, kannguttaatsuliortarsimasutut, Eqqartuussisoqarfik Sermeersuumi sisamanngornermi eqqartuunneqarpoq.
AAMMA ATUARUK Aki-Matilda: Eqqartuussivikkut piviusoq naqissuserneqarpoq
Eqqartuussivimmi suliap inernera Naligiissitaanissamut Siunnersuisoqatigiit siulittaasuata nuannaarutigaa.
- Eqqartuussutip inernerata kinguaassiuutitigut innimiilliortarneq samminerusariaqaripput takutikkaa isumaqarpunga, Kathrine Bødker KNR-imut oqarpoq.
Siunnersuisoqatigiit taakkua marluk tamarmik inuit pisinnaatitaaffii pillugit suliaqartuupput. Tiinganiarfiginnittarnerit kinguneqartinneqartariaqartut Inuit Pisinnaatitaaffii pillugit Siunnersuisoqatigiit isumaqarput.
- Suiaassutsikkut immikkoortitsinerit nikanarsaallunilu tiingaffiginnittarnerit akuersaagassaanngillat, taamaaliortoqarsimatillugulu aamma kinguneqartitsisoqartariaqarpoq, siulittaasoq, Sara Olsvig, oqarpoq nangillunilu:
- Killissanik qaangiisarnerit iliuuseqarfigineqanngippata suliallu qaqinneqartanngippata soorunami taava akiuinissaq ajornakusuussaaq.
Mikael Petersen pineqaatissinneqarsimasunut ulluni 60-ini inisissiisarfimmiittussanngorlugu eqqartuunneqarpoq.
Taasumali eqqartuussummut pinngitsuunerarluni suliaq Nunatta eqqartuussisuuneqarfianut ingerlateqqippaa.