Niviaq Korneliussen Apannguaq Lynge Tellesenilu MIO-mit nersornaaserneqartut
Meeqqat pisinnaatitaaffiinik sullissivik ukiut tamaasa inummut, ilaqutariinnut peqatigiiffimmulluunniit nersornaasiisarpoq. Ukioq manna nersornaaserneqartut marluupput: Tassa Apannguaq Lynge Tellesen aamma Niviaq Korneliussen.
Taakku nersornaaserneqarneranni meeqqat pisinnaatitaaffiinik siammarterinermut meeqqanullu atugassarititaasut pitsanngorsarnerannik immikkut malunnaateqarsimanerat pissutaasoq, MIO nersornaasiinermi tunngavilersuuteqarnermini allappoq.
- Nersornaaserneqarnera uannut pingaaruteqartorujussuuvoq. MIO-p oqariartuutai suliaqarninni pingaaruteqartorujussuupput. Taamaammat ataqqinaataasorujussuuvoq, atuakkiortoq, Niviaq Korneliussen oqarpoq.
- Meeqqat inuusuttullu suleqatigaakka, aaqqiissuussinikkut aporfeqangaatsiartarnerata nalaattarpara. Tamanna sakkortusinnaavoq. Kisimiittutut tusaaneqanngitsutullu misigisimanarsinnaasarpoq.
Suiaassuseq imminut toqunnerlu
Niviaq Korneliussenip suiaassuseq, kinguaassiutit atornerat kiisalu imminut toqunneq pillugu oqallisiginnittalernissaq ukiuni kingullerni sulissutigingaatsiarpaa.
MIO-p oqarnera naapertorlugu taanna namminiunissamut pisinnaatitaaffinnik ukkatarinneqataalersitsivoq. Tamatuma saniatigut sammisaq oqallisigineqannginnerpaasartoq annerpaasorlu oqallitsissutigilerpaa.
Atuakkiortup atuakkiani ”Naasuliardarpi” qaammatialuit matuma siorna saqqummersippaa, taannalu imminut toquttoqartarneranut tunngavoq.
AAMMA ATUARUK Niviaq Korneliussen imminut toquttoqartarnera pillugu: Paquminartuussanngilaq
- Nersornaaserneqarnikkut suliaqarnera iluaqutaasimasoq misigisimavunga. Tusaaneqartutut misigisimavunga. Tamannalu suliamik ingerlatseqqinnissamut nukissaqalersitsivoq, Niviaq Korneliussen oqarpoq.
Taassuma inuusuttut misigissutsiminnik ersitsisinnaanissaannik sammisaqartitsinikkut ilinniartittarpai.
- Nuannisartaqaagut. Inuunermi isumaqartunut uteqqittutut misigisimanartuaannarpoq. Inuuneq naleqartorujussuuvoq. Inuusuttut ilaat artorsaateqarnikooqaat, taamaattorli piumassuseqarlutik sapiillutillu nukittupput. Taakku nukissanitsittarpaannga, nersornaaserneqartoq oqarpoq.
Meeqqat imminut naleqartinnissaannut ikiuisartoq
Nersornaaserneqartup aappaa, Apannguaq Lynge Tellesen ilinniartitsisunngorniartuuvoq Ikamiuninngaanneerlunilu.
Taanna nunaqarfimmi immikkut ittumik suliniuteqarnerminik nersorniarneqarpoq. MIO-p oqarnera naapertorlugu taassuma meeqqat pisariaqartitsisut ikiortarpai, namminerlu sunngiffini atorlugu taakku imminut naleqartinnissamik imminullu tatiginissamik ikiortarlugit.
Apannguaq Lynge Tellesen
MIO-mit nersorsaat allagartartaqarpoq nersornaaserneqartunullu immikkut 10.000 koruuninik aningaasartaqarluni.
Nersornaat Dronning Ingridiup Meeqqanut Immikkoortortaqarfianut, Peqatigiiffik Qajaq Nuummut siusinnerusukkut tunniunneqarnikuuvoq.
Aappariit Birgitte aamma Kikkik Høyer Broberg Qaqortumeersut siorna nersornaaserneqarput. Taakku tallimanik autismemik nappaateqartunik meeraqarput.
MIO-mit siullerpaamik 2013-imi nersornaasiisoqarpoq.
