Nakorsat peqatigiiffiat: Kræftimik katsorsaanermut aningaasat amerlanerusariaqarput
Nunatsinni kræftimik nappaateqartut nappaamminnik toqquteqarnissaat nunat avannarlernut allanut naleqqiullugu marloriaammik aarlerinarnerusoq, misissuinermi qanittukkut paasineqarpoq.
Nunatsinni tunisat ataatsimut nalingata taamaallaat 8 procentiata peqqinnissaqarfimmut atorneqartarnera tamatumunnga ilaatigut pissutaasoq nunatsinni nakorsat peqatigiiffiannit oqallissaarummi allaaserineqarpoq.
Hans Christian Florian Sørensen naapertorlugu, skandinaviami nunat allatuulli pitsaatigisumik peqqinnissaqarfeqarnissamut aningaasat peqqinnissaqarfimmut immikkoortinneqartartut naammanngilluinnarput.
AAMMA ATUARUK Nunatsinni kræftimik toqquteqartut marloriaammik amerlanerusut
Taamaammat Naalakkersuisut peqqinnissaqarfimmut aningaasaliissuteqarnerunissaannik kaammattorpai. Aningaasat taakku siniffissanut amerlanernut, atortorissaarutinut pitsaanerusunut minnerunngitsumillu akissarsiaqartitsinerunissamut sulinermilu atugassarissaarnerunissamut atorneqassasut nakorsat peqatigiiffiata kissaatigaa.
Misissuinermi inerniliussat pimoorullugit aammalu pujortartarnerup imigassartortarnerullu pitsaaliorneqarnissaat peqqinnartunillu nerisaqarnerulernissaq ukkatarineqartoq, peqqinnissamut naalakkersuisup sapaatit akunnerata siuliani oqaatigaa.
Tamannalu kræftimik nappaateqalertut ikilisinnissaannut pingaaruteqaraluartoq, nunatsinni peqqinnissaqarfik skandinaviami nunat allatuulli pitsaatigilissaguni aningaasanik amerlanernik pisariaqartoq, Hans Christian Florian Sørensen oqallissaarummi allappoq.
