Qimaasut aalajangersimasumik amerlassusillit Inatsisartuni oqallisigineqassapput
Tamatummunga pissutaavoq, urani pillugu innuttaasut taasitinneqarnissaannik siunnersuutit marluk ulluni marlunni sivisuumillu oqaluuserineqarmata, oqaluuserisassat arlaqartut angumerineqanngimmata.
Inatsisartut oqaluuserissassaannut ilaavoq, inatsisartunut ilaasortap Naaja Nathanielsenip Attaaviitsup siunnersuutaa, tassalu, qimaasunik agguataarinerni aalajangersimasumik amerlassusilinnik nunatsinnut tikisitsisinnaaneq, Nuna allamiunut tunngasut Kalaallit Nunaannit tiguniarnerannik suliami ingerlanneqartumut atatillugu.
Naaja Nathanielsenip nassuerutigaa oqallinnissap attortinnarsinnaanera, aammalu qinikkat innuttaasullu akornanni nunatsinnut qimaasunik tikisitsinissanut akerliusoqarnera ilisimavai. Oqallinnissarli pingaaruteqartoq Naaja Nathanielsen erseqqissaavoq.
Nunanut Allanut Naalakkersuisoq Vittus Qujaukitsoq siunnersuuteqartumut akissuteqarluni allappoq, siunnersuummut tunngavilersuutigineqartoq nersornartariaqartoq.
Europami qimaasut kialluunniit tusagassiuutitigut takuinnarlugit sunnertinngitsoorsinnaasanngilaq eqqarsanngitsoorsinnaananilu: Ikiuussinnaanerpugut? Nunanut allanut Naalakkersuisoq aperivoq.
Taamaakkaluartoq siunnersuutip itigartinneqarnissaa innersuussutigaa, Nuna allamiunut tunngasut Kalaallit Nunaannit tiguniarnerinik isumaqatiginniarnermi maannakkut ingerlanneqartumi misissugassaqarmat.
Inatsisartut ataatsimiinneranni aalisarnermut inatsit oqaluuserissavaat.
Inatsisartunut ilaasortap Nikolaj Jeremiassenip Siumumeersup, kitaani raajanut TAC-ip agguaanneqarnerani sinerissap qanittuani aalisartunut avataasiortunullu assigiimmik 50/50-ngortillugu allanngortinneqarnissaannik siunnersuutigaa.
Taakkua saniatigut siunnersuutigineqartunut ilaavoq, Nammisornersorlutik Oqartussat kommunillu Danmarkimi nunanilu allani kiffartuussinernut atatillugu aningaasartuutigisartagaasa aalajangiiffigisassaattut siunnersuut
Misissuinermi aamma innersuussutit qanoq ililluni nunatsinni kiffartuussinerit atorluarneqarnerusinnaanerat, taamaalilluni nunatta avataaniit kiffartuussinerit annikillisarnissaat anguneqaqqullugu. Siunnersuut Partii Naleraq sinnerlugu inatsisartuni ilaasortamit Anthon Frederiksenimit siunnersuutigineqarpoq.
Inatsisartut ataatsimiinneranni oqaluuserineqartut inatsisartut nittartagaanni inatsisartut.gl-imi atuarneqarsinnnaapput.