Misissuineq: Kviksølv uummatillu taqaatigut nappaateqarneq nunatsinni attuumassuteqanngillat
Misissuineq innuttaasut peqqissusaannik 2005-imit 2010-mut misissuinerit inunnit 3083-init peqataaffigineqartut tunngavigineqartut misissuinermi pingaarnertut allaaserinnittoq, ph.d-nngorniartoq Trine Jul Larsen, oqaluttuarpoq. Tassani aammi kviksølveqarneq uummatillu taqaani nappaateqarneq imminnut attuumassuteqarnersut paasiniarneqarpoq.
Finlandimi kviksølvi uummatillu taqaatigut nappaateqarneq imminnut attuumassuteqartut paasineqarsimasioq ph.d.-nngorniartoq paasissutissiivoq. Taassumali misissuinera naapertorlugu nunatsinni allaaneruvoq.
AAMMA ATUARUK Omega-3 naggueqatigiinnut Inunnuinnaq peqqinnartuua?
- Soorunami Kalaallit Nunaanni uummatip taqaatigut nappaateqartoqarpoq. Tamanna nalunngilarput. Kisianni una misissuineq tunngavigalugu oqarsinnaavugut uagut Kalaallit Nunaanni kviksølv peqqutigalugu uummatip taqaatigut nappaateqanngilagut, Trine Jul Larsen oqarpoq.
Misissuineq siorna saqqummiunneqartoq kalaaliminertornermi qanoq sissuertiginissaq pillugu oqallinneq eqqarsaatigalugu pingaaruteqartoq, Trine Jul Larsen isumaqarpoq.
- Kalaaliminertuutigut taakkua kviksølvitaqartut nalunngilarput, aamma uagut inuiaat aatta iluini kviksølvitaqartugut nalunngilarput. Taamaakkaluartoq paasivarput, kviksølv peqqutaalluni uummatip taqaatigut nappaateqanngilagut, Trine Jul Larsen oqarpoq, nassuiaallunilu kalaalimerngit timimut iluaqutaasunik akoqartut soorlu omega-3 seleniummilu.
AAMMA ATUARUK Siunnersuisoqatigiit aarluttunnginnissamik inassuteqartut
Erseqqissarpaali kisimi uummatip taqaatigut nappaateqarneq misissuiffigineqartoq, kviksølv pissutigalugu nappaataasinnaasut allat misissuiffigineqarnatik.
Kalaallillu allanut naleqqiullugit kviksølveqangaatsiarput.
- Issittumi uagut kalaallit kviksølveqarnerpaavugut, Trine Jul Larsen oqarpoq.