Omega-3 naggueqatigiinnut Inunnuinnaq peqqinnartuua?

Naggueqatigiit Inuit, assersuutigalugu Europamiunut naleqqiullugit uummasserisannginnerusarnerat, aallu ingerlaviani nappaateqannginnerusarnerannut maanna immaqa nassuiaatissaqalerpoq.

Naggueqatigiit Inuit inuup sananeqaataanut ilisarnaatitut takussutissaataasa, tassa DNA-vat, naajartornerluutinik, tassa mutationinik, immikkuullarissunik peqartut misissuinerit takutippaat, tamannalu pissutaalluni assersuutigalugu Omega-3 fedtsyret naggueqatigiit Inunnut Europamiunut naleqqiullugu peqqinnarnerusoq ilisimatuut paasisimavaat, inernerillu ilisimatuussutsikkut atuagassiami Science-imi saqqummiunneqarput.

- Naggueqatigiit Inuit Europamiunut naleqqiullugu sooq uummasserisannginnerusarnersut, aallu ingerlaviani nappaateqannginnnerusartut misissorneqarmat paasineqarpoq naggueqatigiit Inuit aalisartornerullutillu miluumasunik imarmiunik nerisaqarnerusarnerat ilaatigut pissutaasoq. Omega-3 fedtsyrellu inunnut tamanut peqqinnartuusoq inerniliunneqarpoq, Rasmus Nielsen, Statens Naturhistoriske Museumimi, tassa Naalagaaffiup pinngortitaleriffiata katersugaasiviani professori, taama oqarpoq.

- Nagggueqatigiit inuit immikkuullarissunik nerisaqarnerat ilaatigut pissutaalluni DNA-vat naajartornerluutinik immikkuullarissunik peqarpoq, nerisallu naggueqatigiinnut Inunnut peqqinnartut inuiaqatigiinnut allanut immaqa peqqinnannginnerupput, atuagassiaq Science taama allaaserisaqarpoq.