Kviesgaard: Sinneqartooruteqarneq isumalluutaassanngilaq

Nunatta karsiata 137 millionit koruuninik sinneqartoornera isumalluutaassanngitsoq, GrønlandsBANKEN-imi pisortaq Martin Kviesgaard isumaqarpoq.

- Immikkuullarissumik aalisarluarneq aalisakkanullu akit qaffasinnerat ilaatigut pissutigalugit, Nunatta karsia sinneqartoorluarpoq, tamannalu pitsaasuuvoq. Nunattali karsiata sinneqartoornerani Nunatta aningaasaqarniarnerani ajornartorsiutit aaqqinneqanngitsut, aningaasaqarnermut naalakkersuisup Randi Vestergaard Evaldsenip siornatigut oqarnera isumaqatigaarput, Martin Kviesgaard KNR-imut allappoq.

Nunatta karsia 73 millionit koruuninik amigartooruteqartussatut missingersorneqaraluartoq 137 millionit koruuninik sinneqartoorpoq. Tamannalu missingersuutigineqartunit 210 millionit koruuninik amerlanerupput.

Aamma atuaruk Professorip sinneqartoorneq nuannaarutigaa

Taamaakkaluartoq aaqqissuusseqqinnerit suli pisariaqarluinnartut Martin Kviesgaardip erseqqissaassutigaa.

- Aaqqissuusseqqinnerit annertuut ataavartumik aningaasaqarnermut, aningaasarsiornikkut ineriartortitsinermut siuariartortitsinermullu atorfissaqartinneqarput. Taamaammat sinneqartoorneq sinnassaataananilu, aaqqissuusseqqinnernut kinguarsaataassanngilaq, Martin Kviesgaard allappoq.

Aamma atuaruk Nunatta karsia tupaallannartumik sinneqartooruteqarujussuarpoq

Aaqqissuusseqqinnerilli kisimiillutik Nunatta aningaasaqarniarnera aaqqinnavianngikkaat GrønlandsBANKEN-imi pisortaq isumaqarpoq.

- Inuussutissarsiornerit namminersortunit ingerlanneqartut ineriartortinnissaat ukkatarineqarnissaat pisariaqartilluinnarparput, Martin Kviesgaard allappoq.

Aamma atuaruk Aningaasarsiornikkut imminut napatilernissaq inornartoq