Kuupiup Hellellu Løkke itigartippaat
- Unikaallassinnarlusi piffissaq aatsitsitassarsiutileqatigiiffimmik ataatsimoorussamik namminersortunit pisortanillu pigineqartumik pilersitsinissamut atorallarsiuk. Venstrep siulittaasuata statsministeriusimallu Lars Løkke Rasmussenip tupaallannartumik oqaatigisai taama nipeqarput. Siunnersuutaali Kuupik V. Kleistip Helle Thorning-Schmidtillu tusagassiortunik katersortitsinermi itigartippaat.
- Lars Løkkep taamatut oqariartuuteqarnera eqqumiigilaanngitsuunngilara. Nammineerlunga oqaloqatiginngilara, tamannali pillugu oqaloqatigisariaqassagunarpara, Kuupik V. Kleist unnerpoq.
- Danskit kalaallilluunniit naalakkersuisuisa suliassanik taamatut aningaasalersuinissaat soqutigisarfiginngilarput. Inuussutissarsiutinik inerisaanissamut ingerlatseqatigiiffiit suliniutinik nutaanik aallartisaanissamut ikiuuttussat pigereerpagut. Tassungali tunngatillugu erseqqissarneqassaaq ingerlatseqatigiiffiit - suminngaanneerneri apeqqutaatinnagit - niuerneq tunngavigalugu assigiinnik atugassaqartinneqarlutik aningaasaliisinnaammata - aamma tamanna danskit suliffeqarfiutaannut atuuppoq, Kuupik V. Kleist oqarpoq.
Statsministerittaaq Løkkep oqariartuutigisai eqqumiigivai: - Allaanngilaq Lars Løkke statsministerip issiavianit ungasippallaalersimasoq. Namminersorneq pillugu inatsit akuersissutigineqarmat Venstre naalakkersuisuutitaqartuuvoq. Namminersorneq pillugu inatsit akuerereerniuullugu oqallinnermi allatut isummertoqarnera eqqumiiginartupilussuuvoq. Statsministerillu oqaatigaa suliniutit angisuut pillugit inatsit pillugu suliassaq angisooq tassaassasoq Namminersorneq pillugu inatsimmik pimoorussamik misilittaavigineqartussaq.
- Venstrep kalaallit kissaataannik tunngaviatigut tapersersuillutillu ataqqinnittariaqaraluarput. Kalaallit suliniutit angisuut pillugit inatsisaat allamiut pillugit inatsisiliornermi maleruaqqusani allannguutinik folketingimit isummerfigineqartussanik pisariaqartitsissaaq.
Maannamut Dansk Folkeparti enhedslistenilu itigartitsiniarlutik nalunaareersimapput. Taamaammat illuatungiliuttuni partiip ataatsip arlallallilluunniit siunnersuut upernaaru suliarineqalerpat akuerseqataanissaat naalakkersuisut pisariaqartissavaat. Partiit illuatungiliuttut annersaata, Venstrep, inatsisissatut siunnersuut atuaqqaartinnagu isummerfigiumanngilaat, ippassarli oqariartuutigineqartoq naapertussagaanni kalaallit danskillu naalakkersuisuisa amerlanerussuteqarsinnaanissaat ajornakusooratarsinnaavoq.
Naalakkersuisut aallartitaat maannakkorpiaq Danmarkimiipput. Tassani ilaatigut danskit partiivisa siuttuinut qujageqqusaartussaapput. Amerlanerpaanik amerlanerussuteqalernissaq kisaatigineqarpoq, inatsimmilli allanngortitsinissamut amerlanesussuteqarnissamut maannamut folketingimi ilaasortat akornanni taasisutissat qulit amigaatigineqarput.
