Kuupik V. Kleist: Aporaattunik soqutigisaqarneraaneq ilumuunngilaq

Inuit Ataqatigiit siulittaasuat, Kuupik V. Kleist, politikeritut sulinermi saniatigut aningaasaliisartut piginneqatigiiffiillu nunani allanneersut nunatsinni uuliasiornermi aatsitassasiornermilu suliaqarnissamik aamma attaveqarnermi atortunik inissianillu sanaartornissamik soqutigisaqartunik siunnersuisalerniartoq, aviisimi Berlingske Businessimi ullumi allaaserineqarpoq.
Allattoq Dorthea Johansen
marsip 28-at 2014 10:12

Tamannali ilumuunngitsoq, Kuupik Kleist erseqqissaavoq.

- Soorunalimi Inatsisartunut ilaasortatut, pingaartumillu Inuit Ataqatigiinni siulittaasutut aatsitassarsiorniartunut akuliussinnaanera matoqqalluinnarpoq. Politikeriuniaraanni taamatut iliortoqarsinnaanngilaq. Inatsisartunut ilaasortaatillunga, minnerunngitsumillu Inuit Ataqatigiinni siulittaasuutillunga taamaaliornissaq uannut matoqqavoq, Kuupik V. Kleist oqarpoq.

Kuupik aporaatttunik soqutigisaqarneragaavoq

Kuupik Vandersee Kleisti, parteeqataalu Ove Karl Berthelsen aamma IA-mi allattaanerusimasorlu Hans Pavia Egede siunnersuisartutut suliffeqarfimmik pilersissimapput. Tassani pilersaarutinik assigiinngitsunik suliaqarput, pingaartumik suliffissaaleqineq annikillisarniarlugu suliaqarlutik.

- Pilersaarutinik assigiinngitsunik suliaqarnikuuvugut. Pingaartumik nunatsinni suliffissaaleqineq eqqarsaatigalugu sulisinnaassuseqartut, sulisinnaassuseqanngitsutullu oqaatigineqartartut piginnaasamikkut qaffassarneqarnissaannik tunngasunik assut soqutiginnippugut. Taavalu nunatsinni inuussutissarsiornermi ingerlatsiniartut arlaatigu ikiuuffiginisinnaagutsigit soqutigisaqarfigivagut, Kuupik V. Kleist oqarpoq.

Politikerip Inatsisartuni ilaasortaanermi saniatigut marloqiusamik suliaqalernissaa "ajornartorsiuterujussuartut" Peqquserluttarneq akiorniarlugu suliniaqatigiiffiup, Transparency Greenlandip, aviisimi Berlingske Businessimi taavaa.

Kuupik V. Kleistillu tamanna isumaqatigaa.

- Aatsitassarsiorniartunut pulagaluaraanni taanna akornutaasinnaasoq isumaqatigilluinnarpara, Inuit Ataqatigiit siulittaasuat, Kuupik V. Kleist oqarpoq.

Siunnersuisartutut suliffeqarfik Group Greenland ApS ukiut tallimat matuma siorna pilersinneqarpoq. Siornatigut GreenGemsimik taajuuteqarsimavoq, ukioq mannalu januarimi Group Greenlandimut allanngortinneqarsimalluni. 

Aamma atuaruk