Kuupik aporaatttunik soqutigisaqarneragaavoq

Inuit Ataqatigiit siulittaasuat, Kuupik V. Kleist, aningaasaliisartut piginneqatigiiffiillu nunani allaneersut, Nunatsinni uuliasiornermi atsitassarsiorermilu suliaqarnissaaanni, taavalu attaveqarnermi atortunik inisssianillu sanaartornissamik soqutigisaqartunik, politikeritut sulinermi saniatigut, siunnersuisalerniartoq, aviisimi Berlingske Businessimi ullumi allaaserineqarpoq.
Allattoq Jens Thorin
marsip 28-at 2014 07:04

Politikeri qaffasissumik inissisimaffeqartoq, 55-inik ukioqartoq, siunnersuisartutut suliffeqarfimmik, Group Greenlandimik, pilersitseqataaqqammerpoq, Aatsitassarsiornermut siornatigut Naalakersuisuusoq, Ove Karl Berthelsen, ilaatigut peqatigalugu.

Kuupik V. Kleist oqarpoq, nunani allani piginneqatigiiffiit, aatsitassarsiornemik suliniutinut, inissialiornermut attaveqatigiinermilu atortunut aningaasaliinissamut periarfissanik paasisaqarusullutik sianerfigisarsimagaanni.

Aamma oqarpoq, Nunatsinni aningaasaleerusunneq nammineq politikeritut annertusarusullugu. Taavalu aamma Group Greenlandimi Nunatta, aningaaasaliisartullu nunani allaniittut, nunatsinni suliaqarnerorusuttut attaveqatigiilernissaanut ikiorsinnaallugit.

Politikerip Inatsisartuni ilaasortaanermi saniatigut marloqiusamik suliaqalernissaa "ajornartorsiuterujussuartut" Peqquserluttarneq akiorniarlugu suliniaqatigiiffiup, Transparency Greenlandip, aviisimi Berlingske Businessimi taavaa.

- Kuupik Kleist politikeritut suliaqarnermi saniatigut siunnersuisarfimmik ingerlatsiniarpat tamanna ajornartorsiuterujussuanngussaaq. Marluutittariaqanngilai. Tatiginassusaami apeqquserneqartalissaaq, eqqartuussissuserisoq, Anders Meilvang, Transparency Greenlandimi siulittaasoq, aviisimut oqarpoq.

Kuupik V. Kleist nassuerpoq, nuna tamakkerlugu politkeriunissaq imminut immaqa ajornartorsiutinngorsinnaasoq, siunnersuisarfik piffissap ilaani, issuaaneq aallartippoq: "suleqateqarnissamik, uanga politikeritut suliannut naapertuutinngitsumik ilioraluarpat", issuaaneq naavoq.

- Soqutigisat pillugit aaqqiagiinngittoqaleraluarpat, sorusunnerlunga soorunami aalajangertariaqassaanga. Isumaqatigilluinnarpara politikeriussaguma Nunatsinni Nunatsinnullu tatiginartumik sulisariaqartunga, Kuupik V. Kleist aviisimut Berlingske Businessimut oqarpoq.

Aammali oqarluni:

- Politikereqatittut allatulli Inatsisartutut sulinerma saniatigut allanik aamma suliaqarusuppunga, Kuupik V. Kleist oqarpoq.

Aamma atuaruk