Kuupik USA-mut qaninniarusuppoq

Nunanut allanut politikkimut nassuiaammi, sapaatip-akunnerani uani siusinnerusukkut saqqummiunneqartumi, tamanna takuneqarsinnaavoq. Nunami pissaanilissuarmi USA-tut ittumi Kalaallit Nunaata peqataanissaa qangali kissaatigineqartarpoq, Naalakkersuisut siulittaasuat, Kuupik Kleist erseqqissaavoq.

Atassutip siunnersuutaanut akissummi tamanna erserpoq, Atassuti kissaatigaa, Danmarkip aallartitaqarfiini, tassa USA-rpiami, Tysklandimi Ruslandimilu, kalaallinut soqutiginartunik aallartitaqarnikkut aallartitaqalernissaa.

Atassutillu siunnersuutaa Naalakkersuisunit tassa tapersersorneqarpoq, USA-li tassa salliutikkunneqarpoq.

Danmarkimi nunanut allanut tunngassuteqartunut ministereqarfik suleqatigalugu Kalaallit Nunaata aallartitaqarfinni pilerinartuni sinniisoqartalernissaa qanorpiaq akeqassanersoq ukioq naatinnagu naatsorsorneqassaaq.

Danmarkip aallartitaqarfiini, Kalaallit Nunaannut pingaaruteqartuni, Namminersorlutik Oqartussat akiligaannik, Nunatsinni ilinniagaqartut ajornannginnerusumik praktikkerfissarsisinnaalernissaat Naalakkersuisut aamma anguniarniaraat, nunanut allanut politikkimut nassuiaataanni aamma allassimavoq.

USA-p, Tysklandip Ruslandillu saniatigut, nunani pingaaruteqartuni taaneqarput Island, Tuluit Nunaat, Frankrig, Kina, Canada Japanilu.

Kalaallit Nunaat Københavnimi Bruxellesimilu ullumikkut aallartitaqarfeqarpoq.