Kuupik: Ukiut qulit qaangiuppata tunngaviusumik inatsiseqalersimassaagut
Tunngaviusumik inatsisissaq danskit kunngeqarfiata iluani atuutissaaq, Danmarkimik naalagaaffeqateqarnermit ullumikkutut atuuttumit pittuttuinnginnerusoq. Soorlu ullumikkut Danmarkip, Kalaallit Nunaata Savalimmiullu naalagaaffeqatigiittut inississimanerattut pituttuitsitiginngitsoq, DR allaaserisaqarpoq.
Tunngaviusumik inatsiseqalernissaq Inatsisartuni amerlannerussuteqartunit ulapputigineqaleruttorpoq. Inuit Ataqatigiit Siumullu inatsisartuni aalajangigassatut siunnersuuteqarput, tunngaviusumik inatsiseqalernissaq pillugu ataatsimiititaliarsuarmik Naalakkersuisut pilersitsinissaat peqqussutigineqassasoq.
Takorluugaq siunissaq pillugu ataatsimeersuarnermi ippassaq pisumi saqqummiunneqarpoq. Kuupik Kleistilu tassani erseqqisaavoq, tunngaviusumik inatsiseqalernissamik sulineq Danmarkimiit avissaarnissamut ikaarsaariarnertut isigineqartariaqanngitsoq:
- Tunngaviusumik inatsiseqalernissamik sulineq aamma periarfissatsialaasinnaavoq eqqarsaatiginninnissamut, pingaartitat suut inuiaqatigiinni tunngaviussanersut. Kalallit Nunaanni allanngornersuaqaleruttorpoq, taamaammat iluassaaq isummavut erseqqisassalugit, assersuutigalugu pissaanerup aqunneqarnissaanut, inuit pisinnaatitaaffiinut, meeqqat pisinnaatitaaffiinut, inuiaat namminersortuunerannut pissutsinullu tunngaviusunut assigiinngitsunut tunngasutigut, DR Nyheder-inut oqarpoq.
Assersuutigalugu pinngortitamut kalaallillu kulturiannut isiginninneq tunngaviusumik inatsimmi ilaassasut, IA isumaqarpoq.
Savalimmiuni tunngaviusumik inatsisissamut missiliussaq Savalimmiut Naalakkersuisuisa siorna saqqummiummassuk, statsminister Lars Løkke Rasmussen sakkortuumik qisuariarpoq.
Atlantiku qulaallugu oqqattoqareersorlu, Savalimmiormiut tunngaviusumik inatsisissatut missigiussartik tunuartiinnartariaqarpaat.