Kuupik: Tartupaluk suli pigineqanngilaq
- Tartupaluk naalagaaffimmit aalajangersimasumit pigineqanngitsutut inissisimagallassaaq, qeqertaq taanna Canada-p nunattalu killeqarfianik allannguingaassanngimmat, Naalakkersuisut siulittaasuat Kuupik V. Kleist oqarpoq.
Killeqarfik pillugu suliassat marluk kingulerupput tassalu Tartupaluk pillugu suliaq aappaattullu killeqarfik pitarlugu immap naqqani qillerinermi uuliaqarfimmik gasimilluunniit nassaartoqarpat tamatuma Canadap Kalaallit Nunaata akornanni pissuseqarfigineqarnissaa isumaqatiginniutissani tullinnguuttut, Naalakkersuisut siulittaasuat Kuupik V.Kleist oqarpoq.
Kalaallit Nunaata Canadallu akornanni killeqarfik pillugu Nunanut allanut tunngasunut ministerip Villy Søvndalip Canadamilu nunanut allanut tunngasunut ministerimik John Bairdimik Canada-mi Ottawa-mi pingasunngormat ataatsimeeqateqarnerani isumaqatigiissutigineqarpoq.
Killeqarfimmik isumaqatigiissutip nutaap pingasunngormat ismaqatigiissutigineqartup 1973-mi isumaqatigiitaagallartoq taarserpaa, soorluttaaq killeqarfik pillugu nalunaarut Ilulissani 2008-mit pisoq naqissuserneqartoq.
Killeqarfik isumaqatigiissutigineqartoq 3.000 killometerisut isorartutigivoq, taanna nunatta kujataanit Davis Stræde aqqusaarlugu Baffinip kangerliumarngata imartaanit avaannamut Qalalersuup tungaanut isorartutigaluni.
Tartartupaluk pillugu isumaqatigiissuteqartoqanngilaq, qeqertaq taanna killeqarfimmik aalajangiinissamut allannguissanngilaq.
Tartupaluk Danmarkimit aamma Canadamit pigineqartutut nalunaarutigineqartarpoq, taamaakkaluartoq Nunanut allanut ministerit ataatsimiinneranni Tartupaluk pillugu isumaqatigiissuteqartoqanngilaq.
- Tartupaluk 1,3 kvadratkilometerisut angitigivoq taamaattumillu killeqarfimmik aalajangiivittoqarpat killeqarfimmik allannguisinnnnaanera killeqarluni. Tartupaluk naalagaaffimmit aalajangersersimasumik pigineqartutut inissisimanngilaq, Kuupik V.Kleist oqarpoq.
- Tartupaluk naggueqatigiit inuit qeqertaataattut isigineqarallarniarli killeqarfivimmik titarsisoqarnissaata tungaanut, Kuupik V.Kleist oqarpoq.
Tartupaluk suliassatut nukinginnarnerpaatut isigineqanngikkallarpoq, Naalakkersuisut siulittaasuat oqarpoq.
Nunatta Canada-llu akornanni killeqarfik akimorlugu uuliamik gas-imillu nassaartoqarpat iliuusissat pillugit Danmark Kalaallit Nunaat sinnerlugu Canada-mik isumaqatiginniassaaq, tassunga ilanngullugu Tartupaluk pillugu ukiortaap kingorna isumaqatiginniartoqassasoq Naalakkersuisut siulittaasuat Kuupik Kleist oqarpoq.
