Kuupik Kleist Tunngaviusumik Inatsisissaq pillugu Isumalioqatigiissitami siulittaasutut tunuarpoq: - Misigisimagama nikeriarsinnaarpiarnanga

Marlunngornermi tusagassiuutinut nalunaarummi Naalakkersuisut nalunaarutigaat Tunngaviusumik Inatsisissaq pillugu Isumalioqatigiissitami siulittaasoq Kuupik V. Kleist tunuartoq.

Naalakkersuisunut siulittaasuusimasoq Inuillu Ataqatigiit sinnerlugit politikeriusimasoq decembarimi isumalioqatigiissitanut siulittaasunngorpoq. Taamaalilluni isumalioqatigiissitani qaammatit tallimat missaanni siulittaasuuvoq.

KNR-imut nassuiaavoq isumalioqatigiissitani suleqatigiinnissaq ajornartorsiutaasimasoq. 

- Suliassat qanoq ingerlanneqarnissaat ilaasortat akornanninngaanniit ilaatigut isumaqatigineqanngimmat pissutigineruara. 

- Misigisimagama nikeriarsinnaarpiarnanga taavalu aamma suliap ilungersunarnera eqqarsaatigalugu missingersuusiorneq imaannaanngitsuugami taamaalillunilu suliassartaa tassani annertunerpaartaaq ingerlanneqartariaqaraluarluni.  Makkua malittarisassakujuit (formaliteter) pivallaarnagit kisianni suliassarpiaa tassalu inatsisissatut missingersuusiuneq isumaliuutissiissusiorneq taakkua pingaarnerutillugit suliarineqarnissaat uanga kissaatigigakku, allaffimmiutut sulinissaq pinnagu, Kuupik V. Kleist oqarpoq.

Januaarimiit isumalioqatigiissitani allaffeqarfimmi pisortaqarsimanngilaq. 

Isumalioqatigiissitat aalajaassusermik amigaateqarput 

Kuupik V. Kleist isumaqarpoq isumalioqatigiissitap sannaa ajornartorsiutigineqartoq, 2017-imi pilersinneqarnerminiilli allanngortinneqarsimanngimmat.

Assersuutigalugu qinersisoqaraangat isumalioqatigiissitami ilaasortanik nutaanik toqqaasoqartarpoq. 2017-ip kingornatigut marloriarluni Inatsisartunut qinersisoqarpoq. 2018-imi Siumup pissaaneq tigummiinnaraa kingullermillu 2021-mi Inuit Ataqatigiit siuttunngorfianni. 

Kisianni aamma isumalioqatigiissitat allaffeqarfianni sulisut taarseraattarput, massakkorpiarlu allaffeqarfimmi pisortamik amigaateqarput.

AAMMA ATUARUK Inatsisit tunngaviusussat pillugit Isumalioqatigiissitaq nutaamik pisortartaartoq

Kuupik V. Kleist isumaqarpoq taarseraannerit ajornartorsiutit annerpaat ilagigaat.

- Assersuutigigukku toqqaasarneq uanga isumaga naapertorlugu naapertuutinngilaq. Soorlu qinersisoqarnerani ilaasortat taarserarneqartarput, Kuupik V. Kleist oqarpoq.

Aallaqqaataaniilli ilaasortaasimasunik massakkut ilaasortaqanngilaq aamma sulisut akornanni aallaqqaataaniit suleqataasimasunik peqarani. Taamaattumik aporfiit annerpaat ilagivaat taamatut inuttanik taarseraarujussuarsimaneq.

Isumalioqatigiissitat sulinerat pilersaarutigineqartutut ingerlanngilaq

Kuupik V. Kleistip isumalioqatigiissitanit tunuarnera Inatsisartuni Naalakkersuisunilu politikerinit nuimasunit malugineqarpoq, taakkulu marlunngornermi isumalioqatigiissitaq pillugu oqallipput.

Partiip illuatungiliuttup Atassutip isumalioqatigiissitat atorunnaarsinneqarnissaat siunnersuutigaa. Siunnersuut partiinit taperserneqangaanngilaq, Demokraatit eqqaassanngikkaanni. Naalakkersuisut siulittaasuat Múte B. Egede (IA) oqaluttarfimmi siunnersuummut Naalakkersuisut isumaat pillugu apeqqutit akiniarlugit piareersimavoq. 

AAMMA ATUARUK Kuupik Kleist bliver ny formand for forfatningskommissionen

Tassani taavaa februaarip naalernerani isumalioqatigiissitat sulinermi naammassinissaanut piffissamik sivitsuinissaq qinnutigisimagaat. Isumalioqatigiissitat sulinermik ukiup affaanik imaluuniit ukiumik ataatsimik qinnuteqarput, tamannalu partiinit tapersersorneqarpoq.

Isumalioqatigiissitat aporfissaat eqqarsaatigalugit Múte B. Egedep partiit aaqqiinissamik nassaarnissaat kaammattuutigaaa, isumalioqatigiissitat suliaminnik naammassisinninnaaniassammata, neriullunilu sapaatip akunnera naatinnagu naapissinnaassallugit,

Tusagassiuutinut nalunaarummi Múte B. Egede oqarpoq, ”pisoq kipiluttunartoq.”

- Inatsit tunngaviusussaq pillugu Isumalioqatigiissitat sulinerat malinnaaffigaarput, nassuerutigisariaqarparpullu sulinerata ingerlanera pilersaarut malillugu ingerlasimanngimmat.

Kalaallit Nunaanni præsidenti imaluunniit kunngi 

Kisianni Kuupik V. Kleistip erseqqissarniarpaa ilaasortat akornanni aporfissaqaraluartoq isumalioqatigiissitani suliaqartoqartoq.

- Oqaatigerusuppara imaanngilaq suliaqartoqarsimanngittoq, massakkut missingersuummik ilivitsuusumik isumalioqatigiissitami suliaqarput.

- Missingersuummik suliaqartoqartumik massakkut paragrafit ataasiakkaat qanorpiaq oqaasertaqarnissaat isumaqatigiinniuteqaqattaarpoq taavalu tulleriinnissaat qanoq isikkoqassanersut apeqqutillu qitiulluinnartut ataasiakkaat assersuutigalugu nunatsinni præsidenteqassanersoq, kongeqassanersoq imaluunniit allatut aaqqissuusisoqassanersoq eqqartorneqarpoq. Taavalu aamma minnerunngitsumik nunanut allanut sillimaniarnermullu apeqqutit annertuut isummersorfigineqarput.

Kuupik V. Kleist qaammat kingulleq ICC-mi atorfeqalerpoq.

Tassami marsimi ukiut arfineq pingasut Inuit Circumpolar Council Grønland-imi præsidentioreerluni 70-inik ukiulik Hjalmar Dahl tunuarpoq.

Taarsiullugu Kuupik V. Kleist suliniaqatigiiffimmut præsidentinngorpoq. 

Erseqqissarpaa Kalaallit Nunaanni ICC-mut præsidentinngornini isumalioqatigiissitanit tuniarnerminut attuumassuteqanngitsoq.