Kuupik Kleist tunngaviusumik inatsisissaq pillugu isumalioqatigiissitami siulittaasunngortoq
Kuupik Kleist tunngaviusumik inatsisissaq pillugu isumalioqatigiissitami siulittaasunngorpoq.
Inatsisartuni partiit annersaat isumalioqatigiissitap siulittaasussaanik toqqaasussaavoq.
Inuit Ataqatigiillu Inatsisartunut siorna qinersinermi taaguunneqarnerpaagamik siulittaasumik toqqaasussasuupput.
Tassalu Inuit Ataqatigiinnut Naalakkersuisunullu siulittaasuusimasoq toqqagaavoq.
Kuupik Kleist siulittaasunngormat, maannamut siulittaasuusimasoq Siumumeersoq Ineqi Kielsen siulittaasup tulliatut atuuffeqalerpoq.
AAMMA ATUARUK Inatsit tunngaviusussaq pillugu Isumalioqatigiissitaq ilaasortassaaleqivoq: Naalakkersuisut utaqqikatappagut
Namminersorlutik Oqartussat tusagassiuutinut taama nalunaaruteqarput.
Isumalioqatigiissitamut ilaasortat sinneri tassaapput, Demokraatineersoq Simigaq Heilmann Naleqqameersorlu Mari Kleist.
Atassut Inatsisartuni partiini kisimiilluni isumalioqatigiissitami sinniisoqanngilaq.
Atassut nunatta naalagaaffeqatigiinniiginnarnissaanik sulissuteqarpoq, isumalioqatigiissitamiititaqannginnissarlu nammineq kissaatigalugu.
AAMMA ATUARUK Atassut Tunngaviusumik Inatsisissaq pillugu Isumalioqatigiissitamiit ilaasortaajunnaarniarluni aalajangerpoq
Naalakkersuisut siulittaasuata, Múte B. Egedep, maanna ilaasortat ilaasortaasimasullu qujaffigai. Taassuma isumalioqatigiissitami ilaasortat sulilluarnissaat neriuutigaa.
- Taamaalilluni suliap inernera, inuiannut kalaallinut Kalaallit Nunaatalu siunissaanut tunngavissiisinnaaqqullugu, Múte B. Egede oqarpoq, nangillunilu.
- Tunngaviusumik inatsisissaq pillugu isumalioqatigiissitaq tunngaviusumik inatsisissatut siunnersuummik, Kalaallit Nunaannut namminersortumut atuuttussamik imaqartumik suliarinninnerminik inaarsaanermut maanna killippoq.