Kuupik Kleist: Nunarput ilaasinnaasariaqarpoq
– Namminersorneq aqqutigalugu tamakkiisumik nunatsinni oqartussaafigineqartut pissutsit sumiiluunniit oqaluuserineqarangaata peqataasussaavugut, Naalakkersuisut siulittaasuat Kuupik Kleist oqarpoq.
Nunanut allanut tunngasunut ministereqarfimmit sisamanngormat oqarput kinamiunik tikeraanik politikkikkut oqaloqatiginninnermi Kuupik Kleistip ilaannginnissaa ileqqunik malinninnerusoq, naalagaaffiit siuttuinik tikeraartoqaraangat taamaattatoq, nunanut allanut ministerip Villy Søvndalip sulisuisa pingaarnerit ilaat radio aviisimut oqarpoq.
- Nunanut allanut ministeriaqarfiup nalunaaruteqarnera ilumuuissunngilaq piffissap ingerlanerani arlalinnik assersuutissaqarpoq, naalagaaffiup pisortaasa arlaanni tikeraarneranni nunatsinnullu tunngasunik pisoqarneranik akuusartugut.
Kuupik Kleist naapertorlugu namminersornerup eqqutereernerani nunanut allanut tunngasunut ministeriaqarfiup taama nalunaaruteqarnera paasiuminaappoq.
- Namminersulinermi pisinnaatitaaffeqarpugut nunat tamalaat akornganni tamakkua isumaqatiginniutigissallugit, Kuupik Kleist oqarpoq.
Naalakkersuisut siulittaasuata suliaq naammassinngitsutut isigaa, pisortatigoortumillu tikeraartoqarnerani issittoq oqaluuserineqassappat arlaatigut peqaataatinneqarnissaminnik piumasaqassallutik, oqarpoq. Taamaassasorlu nunanut allanut ministeriaqarfik Kuupik Kleist sisamanngormat nalunaarpoq.
- Nunanut allanut ministeriaqarfik maannakkut attaveqarfigivarput apeqqutit tamakkua pillugit, aamma nunarput imaluunniit issittoq pillugu oqaluuserineqassappat, taava qanoq ililluta nunatsinninngaanniit qanoq peqaataasoqassappat qulakkeerneqassanersoq, Kuupik Kleist oqarpoq.
