Kuupik: Isumaqatigiinngittaraluarluta suli atavugut

- Isertorneqassanngilaq aallarteqqaarnitsinnili atagaarnaviannginnissatsinnik siulittuisoqartarmat, massakkulli ukiut marluk sinnilaarlugit suleqatigeereerpugut. Soorunami pisut ilaat eqqartorneqartillugit aporaannertaqartumik assortuuttoqartarluni, Kuupik Kleist taama oqarpoq. Aporaassutaasartut tassaanerusimapput aalajangiiniarnerit pingaarutillit.

- Partiit assigiissusaat ersarissorujussuupput, tassami tamatta qinersisigut anguniartussaasarpagut, anguniakkavullu pillugit teqeqqut tamaasa ilanngullugit oqallittarluta, Kuupik Kleist taama oqarpoq. Nuna tamakkerlugu ataatsimeersuaqataasunut ilaavoq partiip Inatsisartunut ilaasortaatitaa, Naaja Nathanielsen, taassumalu partiit assigiinngeqisut suleqatigiinniarnerat qanimut misigisaqarfigisarpaa. Inuit Ataqatigiit anguniagaannik suleqatigiinneq annaanniaannarlugu qasuterivallaartaratik Naaja Nathanielsenip oqaatigaa:

- Inuit Ataqatigiit tungaanniit Naalakkersuisoqatigiit suleqatigiinnerat naammagisimaarparput. Siunissaq eqqarsaatigalugu aalajangiiffigisassaqarpugut artornarsinnaasunik aammalumi oqallinnerit pingitsoorsinnaassagunarnatigit, tamakku eqqarsaatigalugit qujanarpoq ukiut marluk atorlugit immitsinnut ilikkarniarsimanerput. Immitsinnulli ilikkarnerput ima paasineqassanngilaq tassa maanna suut tamaasa isumaqatigiissutigisalissagivut, arlatta politikki siunniussaat isumaallu ilikkarnikuuvagut, tassalu tamakku aqqutigalugit suliat aallartinneqartassaput, Naaja Nathanielsen taama oqarpoq. Taannalu Inuit Ataqatigiit nuna tamakkerlugu ataatsimeersuarnerani, sapaatip akunnerata naanera tamaat ingerlanneqartussaq peqataaffigissavaa.