Kuupik: Issittumi angallanneq maleruagassiorneqartariaqarpoq
Tamatuma peqatigisaani nunat tamalaat imartaat pillugu, suliniaqatigiiffik IMO umiarsuit issittup imartaani angalasartussat qanoq sananeqartarnissaanut maleruagassiussasoq, Naalakkersuisut siulittaasuat Kuupik Kleist taama oqarpoq.
Nunat isittup imartaanut sineriallit tallimat Canadami ataatsimiinneranni taanna peqataaqqammerpoq
- Issittup imartaani angallernerup pituttuisuusumik isumaqatigiissutigineqarnissaannut isumaqatigiittoqarmat, aammalu taassuma saniatigut, imaani angallanikkut kattuffissuup, malittarisassanik suliaqarnissaanik anguniagaqassagatta, tassa issittumi malittarisassat umiarsuarnik assartuinermit tamanik malinneqartussat pilersinneqarnissaat suliniutigineqassaaq, Naalakkersuisut siulittaasuat Kuupik Kleist taama oqaluttuarpoq.
Nunat angisuut nunanut allanut ministeriminnik peqataatitsinermikkut soqutiginninermik takutitsinerat Kuupik Kleistip nuannaarutigaa.
Soqutiginnineq ilaatigut erserpoq, USA-p nunanut allanut ministeriat Hillary Clintonip qaaqqusisoq Canada isornatorsiormagu, Finland, Sverige Islandilu ilanngullugit aggersarumanngimmagit. Isornartorsiuineq tamanna Kuupik Kleistip isumaqatigeqaa.
- Taanna isornartorsiuineq ilulissani siullermeerutaasumik ataatsimiittoqarmalli tusarsaavoq, aamma paasinarpoq. Taassuma saniatigut aamma Hillary Clintonip tikkuartugaasa ilagivaat nunat inoqqaavisa pinngitsooratik peqataatinneqartariaqarnerat taamatut aalajangersagassani sunniuteqarsinnaasorujussuummata. Soorunalinmi isumaqatigaagut taperserlugillu Hillary Clintoni taamatut oqaaseqaateqarmat, tassami inuit issittumi najugaqartut toqqaannartumillu pineqartut, aalajangersaanermi peqataatinneqarnissaat saneqqunneqarsinnaanngilaq, Kuupik Kleist naggasiivoq.
