Kuupik: Clintonip neriorsuinera tutsuiginarpoq
Tusagassiortut nunarsuarmi tamalaaneertut utaqqileruttortut, Kuupik Kleistip Amerikap nunanut allanut tunngasunut ministeria Christiansborgimi Vandrehalimi talumik assiaqutsiinnarlutik minutsini arfinilinni oqaloqatigaa:
- Isumaqarpunga apeqqut taanna ullumikkut erseqqissumik paasineqartoq, tassalu siunissami taamaaliortoqarsinnaassanngitsoq. Aamma nunanut allanut tunngasunut ministerip Clintonip uannut tamanna uannut erseqqissumik uppernarsarpaa. Tassalu allamik tutsuiginarnerusumik qulakkerinnissumik pissarsisoqarsinnaangilaq.
Tassalu Kuupik Kleist naapertorlugu Amerikamiut neriorsuipput, tigusanik Nunarput qulaallugu timmisartuussissagunik akuersissummik pissarsiniaqqaartassasut, aamma Nunatsinnut mittussaanngikkaluarunilluunniit. Taannalu aperaarput, CIA pillugu suliaq naammassisutut isigineraa:
- Imatut oqarusuppunga: Qularaara, pereersimasut eqqarsaatigalugit qulaajaaneq suli annertuseqinneqarsinnaassasoq. Taammattumik uagutsinnut pingaaruteqarnerpaaq tassaavoq, siunissamut tunngassuteqartut aammalu silaannartatta nunatattalu akueriteqqaarani taamatut tigusanik angallassinermi atorneqartarneranut tunngasumik qulakkeerinninnissaq, tassalu taamaaliortoqassappat, tamatigut qinnuteqaqqaarluni aatsaat taamaaliortoqarsinnaasoq, Kuupik Kleist oqarpoq.
Tigusanik timmisartuussinerminni nunarput aqqusaartarunnaassallugu, Amerikamiut 2008-mi neriorsuipput. Kisianni Nunatsinnut Danmarkimulluunniit minnatik silaannartat aqqusaarpatigit, neriorsuut taanna atuunnersoq, DIIS-imiit nalunaarusiami apeqquserneqarpoq. Kuupik Kleistillu Danmarkip nunanut allanut tunngasunut ministeria ullumi siusinnerusukkut aamma naapippaa.
- Malittarisassat marluk uani pineqarput. Uagutsinut erseqqippoq, nunanut allanut ministereqarfiup paasinninnera eqqortuusoq, tamannali inatsisilerinermut ministereqarfiup paasininneranut aporaatinngilaq, malittarisassat marluk pineqarmata. Nalorninartoqalaarsimappallu Amerikamiut nunanut allanut tunngasunut ministeriata ullumi naapinnera nuanneqaaq, tamatumami kingorna nalorninarunnaarpoq, Amerikami naalakkersuisut ataqqigaat, tassalu taama ilioqqissagaluarunik, danskit oqartussaasuinut saaffiginnissasut, aammalu danskit oqartussasuisa aalajangigaannik soorunami ataqqinnissasut, Villy Søvndal oqarpoq. Apeqqutilliisoqassagaluarpallu qanoq akisoqarumaarnersoq erseqqissarpaa:
- Maanna naalakkersuisuusut aperineqassagaluarpata, taava naaggaarneq erseqqilluinnassagaluarpoq, Villy Søvndal oqarpoq.
CIA-mut tunngasut saniatigut aamma Pituffiup sakkutuujunngitsunit atorneqarsinnaanissaa kiisalu nunatsinni aatsitassat Kinamiullu tamakkununnga soqutiginninnerat, Kuupik Kleistip Amerikallu nunanut allanut tunngasunut ministeriata oqaloqatigiissutigaat.
