Kuupik: Allannguinissat tapersersorneqarput
- Akileraartarnerup akitsuuseeriaatsillu allanngortinnissaannut Inatsisartuni inuiaqatigiinnilu tapersersuineq annertunerujartortoq malugaarput. Amerlasuut isumaqarput tamanna pitsaasuussasoq. Aamma nammaqatigiinnerunissamik isumaqartut amerliartorput, Naalakkersuisut siulittaasuat Kuupik Kleist oqarpoq.
Aningaasanulli inatsisissaq saqqummiunneqarmat allannguinissat annertuut takussaanngillat. Soorli tamakku utaqqinneqassappat
- Suliniutit nutaat qanorlu pilertortigisumik suliarinissaat oqimaaqatigiissartariaqarput. Oqaatigiuaannarparput allannguinissat annertuut aatsaat pisinnaasut sukumiisumik misissuinerit oqallinnerillu ingerlateqqaarlugit. Nukingerpallaamik pissagutta inuiaqatigiit malinnaasinngitsoorsinnaavagut aammalu kukkunerit pisinnaallutik, Kuupik Kleist oqarpoq.
Akileraarutit akitsuutillu eqqartorneqartillugit Kuupik Kleist aamma erseqqissumik akissutissaqarpoq. Tassamigooq tamakku pinavianngillat aningaasartuutilli isertitallu oqimaaqatigiisinniarlugit sipaarniarnerit ingerlanneqarumaarmata.
- Akileraarutit akitsuutillu qaffanneqarnissaat siunnerfiginngilarput. Akerlianik sutigut tamatigut sipaarniarsimavugut, aningaasaqarniarnermi sukangavoq annikitsuinnarmillu siuariartoqarsimavoq, Kuupik Kleist oqarpoq.
Kuupik Kleistip aamma Naalakkersuisut taamaasillutik Siumut isumaqatigineruaat, taakku akileraarutit akitsuutillu qaffannissaat akerlerimmassuk, IAp politikkikkut oqaaseqartartua siulittaasuatalu tullia Aqqaluaq B. Egede isumaqartoq akitsuutit annikitsut arlariiaat aqqutissaanerusut isertitat amerlisarnissaannut.