Kuupik aamma Villy aqaguagu naapissapput

Naak paasissutissat Wikileaks-ikkut saqqummiunneqartut malillugit VK-mi naalakkersuisut Folketingimut marloqiammik pissusilersorsimanerarneqaraluartut, DIIS misissuinermini taama ittunik malunnartorsisimanngilaq. Suut tamarmik pissuserissaartumik ingerlasimanerat nalunaarutigineqarmat nunanut allanut ministeri Villy Søvndal toqqissiallassimavoq. Taassuma aqaguagu naalakkersuisut siulittaasuat Kuupik Kleist ataatsimeeqatigissavaa taannalu sioqqullugu nalunaarusiap imarisai pillugit tamarmik oqaaseqarnianngikkallarput.

Arlaannut attuumassuteqanngitsut misissuinissaat pillugu ilungersuutiginnittoq Fraen Aaen misissuinermik isornartorsiuivoq oqaaseqarfigiumallugulu.

- Suli isumaqarpunga suliaq manna suli naammassinngitsoq, Frank Aaen Berlingske Nyhedsbureau-mut oqarpoq ilanngullugulu tikkuarpaa DIIS annikitsuinnarmik tunngavissaqarluni nalunaarusiorsimasoq.

- Paasissutissat pappiaqqat kisiisa tunngavigaat. Apersuinissamut periarfissaqarsimanngillat, ilisimareerparpullu una suliaq sukumiisumik suliarineqassappat amerikamiut aallartitaannik oqaloqateqartarsimasut apersorneqarsimasariaqaraluartut, Frank Aaen oqarpoq.

Nalunaarusiaq 149-nik qupperneqartoq, inerniliivoq CIA imaluunniit Danmarkimi naalakkersuisuusimasut unioqqutitsisimanngitsut, annikitsuinnaat isortorsiugassatut taaneqarsimapput. Misissuinermi Kuupik Kleistip paaserusutai paasineqarsimanersut qularnarpoq tassami taanna Frank Aaen assigalugu piumasaqaraluarpoq sukumiinerusumik misissuisoqassasoq. Aqaguli ataatsimiinnerup kingorna paasinarsiumaarpoq Naalakkersuisut siulittaasuat aamma nunanut allanut ministeri qanoq isummernersut.

DIIS-ip misissuinermini inerniliussai uani takuneqarsinnaapput: http://en.calameo.com/read/00077519475510246fa92