ASSIT Kuultiusumik sølviusumillu nersornaaserneqartut
Inatsisartut siulittaasuata Hans Enoksenip ombudsmandi Vera Leth, nakorsaq Henning Sloth Pedersen nipilersortartorlu Malik Høegh tallimanngornermi nersornaaserpai.
Vera Leth ombudsmanditut ukiut 21-t sinnerlugit sulisoq kuultiusumik nersornaaserneqarpoq:
-1997-imi Ombudsmanditut siullermik ivertinneqarputit, tamatumalu kingorna 1997-imiit ukiut tamaasa Inatsisartunit, iluarisimaarneqarlutit tapersersorneqarlutillu, qinerneqaqqittarlutit, Inatsisartut siulittaasuat oqalugiarnermini ilaatigut oqarpoq.
Ombudsmandi qujamasuttoq KNR-imut ima oqarpoq:
- Attortillungalu assut tulluusimaarpunga. Neriuppunga innuttaasut akornanni atorfeqarfiup eqqumaffigineqqinnerulerneranut sakkortusaatitut sunniuteqarumaartoq,
Henning Sloth Pedersen, nunatsinni nakorsatut ukiorpassuarni sulilluarsimanera pillugu, sølviusumik nersornaaserneqarpoq.
Inatsisartut siulittaasuat nakorsap nunarsuarmi ilisimatuut akornanni nunatta ilisimaneqarnerulerneranut toqqammavisseeqataasimanera pillugu ilaatigut ima oqaaseqarpoq:
AAMMA ATUARUK Nersornaaserneqarnini tupaallaatigigaa
- Århusip universitetiani inuiaqatigiit peqqissusiannut tunngasunik ilisimatusarfimmi lektoritut ilinniartitsisuusimavutit, ilisimatuussutsikkut misissuisarnikkut taamatut suliaqartartut akornanni akuerineqarlutit ataqqineqalersimallutit, taamatullu aamma ilisimatuussutsimut tunngasunik atuagassiani nunat tamalaat akornanni tutsuigineqartuni allaaserisarpassuaqarsimallutit, Hans Enoksen oqarpoq.
Nersornaaserneqartut pingajuat sølvimillu nersornaaserneqartoq tassaavoq nunatta nipilersornikkut oqaluttuarisaanerani sunneeqataasimasoq, nipilersoqatigiinnit Sumékkunneersoq Malik Høegh.
- Utoqqanngulersunut kinguaariinnullu nutaanut kulturikkut kingornussatta nutaajunerusut ilagilersimavaasi.
Hans Enoksen Malik Høeghmut ilaatigut taama oqaaseqarpoq, nangillunilu:
- Oqartoqarsinnaagaluartoq qanganngortoq Sumep kingullermik saqqummersitsineraniit, piffissap ingerlanerani taallat erinnallu ullutsinnut aamma tunngassuteqarnerisa uppernarsarpaat qanoq pingaaruteqartigisimasusi nunatta naalakkersuinikkut nipilersornikkullu oqaluttuarisaaneranut ineriartorneranullu, Inatsisartut siulittaasuat oqarpoq.
