Nersornaaserneqarnini tupaallaatigigaa

Inatsisartut Siulittaasuata Lars-Emil Johansenip Sisimiuneersoq Hanseeraq Enoksen sølviusumik nersornaaserpaa. Nersornaasigaasumullu tamanna tupaallannarpoq.

Inatsisartut siulittaasoqarfiata Sisimiuni pisortap, Hanseeraq Enoksenip, nunatsinni aalisarnermik inuussutissarsiuteqarnerup ineriartortinneqarnerani tunniusimalluni piffissami sivisuumi suliaqarsimanera pissutigalugu sølviusumik nersornaaseraa, Lars-Emil Johansen tusagasiiuutinut nalunaarummi allappoq.

Inatsisartut siulittaasuata oqaaseqarnermini ilaatigut erseqqissarpaa, Hanseeraq Enoksen aalisarnermik inuussutissarsiuteqarnermi inuusuttorpassuarnut maligassiuisuusoq.

Hanseeraq Enoksen ingerlatseqatigiiffik aalisariutaatilik, Angunnugaq Enoksen A/S ukiuini 20-ni ingerlatereerlugu nersornaaserneqarpoq. Hanseeraq Enoksen ingerlatseqatigiiffiup siulersuisuini ilaasortaavoq, Niels Thomsenili siulersuisuni siulittaasuulluni.

Nersornaaserneqarnissani tupaallaatigigaa

Hanseeraq Enoksen Royal Greenlandip kilisaataasa ilaanni ilaatigut aamma naalagaasimavoq.

Hanseeraq Enoksenili nersornaaserneqarnissani paasigamiuk tupaallappoq, nersornaallu akuerissanerlugu eqqarsaatigeqqaarsimallugu.

Ingerlatseqatigiiffinnimmi pilersitsinermini aalisarnermilu sulinermini nersornaaserneqarnissani siunertarisimanngikkaa, Hanseeraq Enoksen KNR-imut oqarpoq.

- Taamanikkut inuusuttuaraalluta ingerlaannaavik ulappusernikuugatta, taamaattussaannartullu isigigaluarparput. Inuuneq taamatut anguniagaqarluni ingerlanneqassasoq, Hanseeraq Enoksen Ivik Kristiansenimut taama oqarpoq.