Kuno Fencker Siumumi ilaasortaajunnaartoq Naleqqamilu ilaasortanngorluni

Partii Siumumit ilaasortaajunnaartoqaqqippoq - Kuno Fencker tamatumuuna Naleqqamut nuuppoq.

Allattoq Christine Hyldal, Andreas Wille

februaarip 11-at 2025 14:08

Nutserisoq Connie Fontain

Kuno Fencker Siumumi ilaasortaajunnaarpoq, Naleqqamilu ilaasortanngorluni.

Taanna tusagassiuutinut nalunaarummi allappoq.

Taamaalilluni nuliassani Aki-Matilda Høegh-Dam Naleqqami ippassaq aamma ilaasortanngortoq malillutgu.

Kuno Fencker tusagassiuutinut nalunaarummi ima allappoq:

- Siumumiit ilaasortaajunnarnerminut tunngavii politikkikkut aamma naleqartitaminik aallaavilimmik aalajangiineruvoq.

- Qangali immikkoortortaqarfinniit Siumut Nuummiit aninissannik ajattorneqartartutut misigisimasarama, ingammik Siumup Nuup siulittaasuanit. Naalagaaffinngorneq Siumumi ataatsimooruttussaagaluarparput, kisianni ilutsinni isumaqatigiinnginnerput miserratigineqarsinnaanngilaq. Soorluttaaq Siumut ilisarnarunnaarluni Inuit Ataqatigiinnut politikkikkut qaninnerulersimanera assut politikkernissamut aporfilersuisarnera ajornartorsiutaalersimagami.

- Naleqqami misigisimavunga tamakkiisumik tunngaviusumik isummakka, nunatsinnullu siunissamut takorluukkakka tapersersorneqartut, Siumumi ilaasortaasimasoq oqarpoq.

Inatsisartunut qinigassanngortittoq

Nalunaarulli taanna Kuno Fenckerip Inatsisartut upernaakkut ataatsimiinnermi nammineq oqaaserisaanut assorsuivipput.

- Peqqissimisaqaanga uanga partii Naleqamiissimangama. Taanna nassuerutigisariaqarpara, Kuno Fencker aalisarnermut inatsisip suliarineqarnerani 2024-mi maajip 16-iani oqarpoq.

Kuno Fencker partiimut ilaasortanngortoq, aamma taanna Aki-Matilda Høegh-Dam assigalugu - Inatsisartunut marsip aqqarnanni qinersinissamut qinigassanngortittoq Naleqqap tusagassiuutinut nalunaarummi ullersarnarpaa.

Taassuma aalajangernini KNR-imit apersorneqarnermini ima oqaaseqarfigaa:

- Aaargh. Artornarpoq. Inuit amerlanerpaat Siumup iluani nuannarisarivakka. Siumumiittut inuit pikkorittuupput.

- Naalagaaffinngornissamut pilersaarutit uanga aamma eqqarsaatinnut assingusorujussuit oqarluaannassaguma tulluarsorigakkit, nuunnissara siunniuppara.

Paragraf 21

Namminersorneq pillugu inatsimmi paragraf 21 Kalaallit Nunaata namminiilivinnissamut periarfissaanut tunngavoq.

Tassani inuiaat kalaallit namminiilivinnissamut aalajangiissasut allassimavoq.

Paragraf aallartinneqarpat danskit naalakkersuisuisa aamma Inatsisartut akornanni namminiilivinnissap piviusunngortinniarnissaa pillugu isumaqatigiinniarnerit aallartinneqassapput.

Naalakkersuisut danskillu naalakkersuisuisa akornanni namminiilivinnissap naammassineqarnissaa pillugu isumaqatigiissut Inatsisartut akuersinerannik tunngaveqassaaq, Kalaallit Nunaannilu innuttaasut taasineratigut akuerineqassalluni.

Folketingimit aamma akuersissuteqartoqassaaq.

Naatsumik oqaatigalugu: Danmarkimut isumaqatigiissuteqartoqaqqaariarluni Kalaallit Nunaanni taasititsisoqassaaq naggataanilu Folketingimi taasisoqassalluni.

Siumup siulittaasua, Erik Jensen aamma apersorniarsaraarput, tamannali suli aamma periarfissaanani.

Aamma atuarukKuno Fenckerip Aaja Chemnitz unnerluutigigaa

Kuno Fencker Donald Trumpip ivertinneqarnissaanut atatillugu USA-mut angalanermini ilisarisimaneqarluarnerulerpoq. Taassuma angalanermini Donald Trumpip partiianeersoq Kongressimut ilaasortaq naapippaa, taakkulu nunatta USA-llu akornanni atassuteqarnerup qanoq pitssaanerulersinneqarnissaa oqaluuseraat.

Kuno Fenckerip angalanernimi USA-p nunatsinnik pisinissaanut Kongressimi inatsisissatut siunnersuuteqartuusoq, Andy Ogles naapeqatigaa.

Siumumi siulittaasup, Erik Jensenip oqarnera naapertorlugu partiimi siulersuisut ilisimatinneqanngillat. Fenckerilu "inuttut nammineq angalasoq", Erik Jensenip oqaatigaa.

Tamanna Siumumi ikuallannarmut aallartitsissutaavoq. Kuno Fenckerillu Aki-Matilda Høegh-Dam peqatigalugu partiimut allamut nuunnissartik eqqarsaatigalugu ammasumik oqaluuserimmassuk tamanna ikuallannermut suli annerulersitsivoq.

Aki-Matilda Høegh-Dam Siumumi ilaasortaajunnaarluni tallimanngormat nalunaarpoq. Taanna Naleraq sinnerlugu Inatsisartunut maanna qinigassanngortinniarpoq.

Qinersinermi kingullermi 66-init taaguunneqartoq

Siumumi isumaqatiginninnginnerup sapaatip akunnerani annertusiartuinnarnerata kingorna taama pisoqarpoq. Kuno Fenckerip Aki-Matilda Høegh-Damillu Siumumi naalagaaffinngornissamut suliaqarneq arriippallaarujussuarsoralugu – partiimiiginnarnissartillu eqqarsaatersuutigalugu sapaatip akunnerata ingerlanerani erseqqissaatigaat.

Aamma atuarukKuno Fenckerip apersorneqarluni oqarasuaat iliinnaraa

Siumumilu pisoqalinnguatsiarpoq. Partiimmi siulittaasuata, Erik Jensenip naalagaaffinngornissamut suliaqarneq aamma sukkatsisinniarpaa, taassumalu Namminersorneq pillugu inatsimmi paragraf 21-p aallartinnissaa qineqqusaarutiginiarpaa. Paragraf taanna naalagaaffinngornissamut aqqummik nassuiaaneruvoq, taannalu naapertorlugu innuttaasunut taasititsisoqassaaq. Ukiullu sisamat tulliuttut ingerlaneranni innuttaasunut taasititsisoqassasoq, Erik Jensen DR-imut tassanngaannartumik sisamanngormat oqaatigaa.

Taanna – Inatsisartuni partiit amerlanerit allat assigalugit – naalagaaffinngornissamut ulluliinissamut tuaviuussisuunngikkaluarpoq.

Kuno Fencker Inatsisartunut kingullermik qinersisoqarmat 66-init taaguunneqarpoq, taannalu Inatsisartuni sinniisussatut ilaasortaalluni.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.