Kunngissap Frederiup Aarhusimi Kalaallit Illuanni kulturikkut inersuaaraq atoqqaartissagaa
Aarhusimi Kalaallit Illuanni kulturikkut inersuaaraq nutaaq upernaarli piareerpoq. Coronalli tunillaassuunnerata kingunerisaanik aaqqissuussinerit tamarmik upernaaq kinguartinneqarnerat pissutigalugu aatsaat pisortatigoortumik atoqqaartitsisoqassaaq.
Kunngissaq Frederik inersuaaqqamik nutaamik atoqqaartitsisuussaaq. Kunngikkormiut Aarhusimilu Kalaallit Illuat taama paasissutissiipput.
Oktobarip ulluisa 28-anni pingasunngornermi atoqqaartitsisoqassaaq. Covid-19-illi Danmarkimi tunillaassuutileqqinnera Danmarkimilu inuit katersuuttut 50-init amerlaneroqqusaannginnerat pissutigalugu peqataasut killeqangaatsiassapput.
Kalaallit Illuata pisortaa, Tanja Nielsen KNR-imut paasissutissiivoq.
AAMMA ATUARUK Pisortartaaq: Aarhusimi Kalaallit Illuutaat amerlanerusunut kajungertitsissasoq
Taamaammat sulisut aamma suleqatigisat allallu immikkut qaaqqusat matumani Midtjyllandimi kalaallit peqatigiiffii ilanngullugit atoqqaartitsinermut kisimik peqataassapput.
Kulturikkut inersuaarartaassaq 2019-ip aallartinnerani suliaralugu aallartinneqarpoq. Tamanna A.P Møller og Hustru Chastine Mc-Kinney Møllers Fondip alliliinissamut 12 millionit koruuneqartumut 6 millionit koruuninik aningaasaliineratigut aallartinneqarpoq.
Kulturikkut inersuaaqqap peqatigiiffinnit Kalaallit Illuutaannut attuumassuteqartunit aamma illuutip nammineq aaqqissuussineranut atorneqartarnissaa siunertaavoq.
