Pisortartaaq: Aarhusimi Kalaallit Illuutaat amerlanerusunut kajungertitsissasoq
Sanaqqiineq, corona pissutigalugu matoqqaneq mattussaaqqanerlu.
49-nik ukiulik, Tanja Nielsen Aarhusimi Kalaallit Illuutaani pisortatut atorfininnermini eqqissisimasumik aallartissangasorisimaguni silattuallassimassaaq.
Taassuma pisortatut atorfik Jørn Holbechip soraarnerani atorfigilerpaa. Pisortartaaq Danmarkip ilarujussuata matoqqanerani Kalaallillu Illuutaani sulisut qassiiusut angerlarsimaffimminnit sulinerisa nalaanni pivoq.
Taamaakkaluartorli illu sanasunik, kulturikkut inersuaaqqamik nutaamik illuutillu pisoqartaanik sanaqqiisunik ulikkaarpoq. Pingaartumik kulturikkut inersuaaraq ornigarneqarlualaalereersoq, Tanja Nielsen oqarpoq.
- Inuit aqqusaaraangamik takusimanngisaannagartik alakkarlugulu assiliartortarpaat.
AAMMA ATUARUK Jyllandip qeqqani kalaallit siuttortaartut
Inersuaaqqallu soqutigineqarluartup inunnik amerlanerusunik – nunatsinnut attuumassuteqartunik attuumassuteqanngitsunillu illuummut ornigartitsinissamut atorluarneqassasoq, Tanja Nielsen oqarpoq.
- Marserlutik soqutiginnittunut isernissamut qaaqqusinissatsinnut periarfissaqarpugut. Inimillu soqutiginartumik nutaamik pilersitsisoqarneratigut nutaamik allaanerusumik ingerlatitsinisssamut periarfissaqarpoq.
Kulturikkut inersuaq nutaaq kalaallit Midtjyllandimi peqatigiiffiinit ilaatigut atorneqassaaq. Aamma oqaluarnernut, filmernermut, nunarput Issittorlu pillugit oqallinnermut atorneqassaaq, atuartut aamma aggersinnaapput.
Aaqqissuussinerit tamarmik Kalaallit Nunaannut ilisimannittoqarnerulernissaanut pingaaruteqarput.
- Nalunngisat tamangajammik Kalaallit Nunaannut ilisimasaqarpallaanngikkaluarlutik isumaqartarput. Oqallinnermillu piukkunnartumik pilersitsissaguttaimmitsinnut ilisimasaqarfigissaagut. Taamaammat pingaartumik suliassaqarpugut, Tanja Nielsen oqarpoq.
Ilinniartut inuussutissarsiornermillu suliaqartut ukkatarineqartut
Pisortaq nutaaq nunatsinni inunngorsimallunilu peroriartorpoq, Alaskamilu kemikeritut ilinniagaqarluni. Taanna Aarhusip qanittuani Skanderborgimi ullumikkut najugaqarpoq.
Tanja Nielsen ingeniørit suliffeqarfianni siusinnerusukkut atorneqarpoq nunatsinnilu aatsitassarsiornermut siunnersuisimalluni, Royal Arctic Linemi siulersuisuniissimavoq kingullermillu Danvami tassa Dansk Vand og Spildevandsforeningimi sulisimavoq.
Aarhusimili Kalaallit Illutaanni ukiuni kingullerni qassiiusuni nammineq kajumissutsimik sulisimanera siulersuisunilu ilaasortaasimanera pisortatut atorfimmik qinnuteqarneranut pissutaavoq.
Tanja Nielsenillu kalaallit ilinniartut pingaartumik ukkatarai. Nunarpummi ineriartussappat ilinniartut amerlanerusut ilinniakkaminnik naammassinnissapput.
- Erseqqissaateqassaguma immaqa ilitsersuineq taanna kalaallinut maani Danmarkimi ilinniartunut tunniuttarparput. Taakkumi Kalaallit Nunaata siunissaraat, taamaalillutillu aqqumminni ikiorneqalaarsinnaapput, maanngami nuunneq ajornakusuulaarsinnaavoq, pisortartaaq oqarpoq.
AAMMA ATUARUK Kalaallit Illuutaat qarasaasiaq atorlugu inuiattut ullorsiortitsiniartoq
Pisortaasimasup Tanja Nielsenip paarlataata Jørn Holbechip kalaallit danskillu suliffeqarfiisa akornanni qaninnerusumik attaveqatigiittoqalernissaa pillugu suliniutit qassiiusut pilersippai. Inuussutissarsiornermillu suliaqartut ukkatarineqaannassasut, Tanja Nielsen oqarpoq.
- Kalaallit inuussutissarsiornermik suliaqartut aarhusimiullu imaluunniit nunap immikkoortuanit Midtjyllandimeersut akornanni suleqatigiittoqarnera isumassaqarluarpoq. Tamanna imaaliallaannaq iperarneqarsinnaanngilaq.
Kalaallit Illuutaasa isumaginninnikkut tapersiinissaq kalaallinullu Danmarkimi najugaqartunut ilitsersuinissaq pisussaaffigaat. Tamanna suliassani suli qitiuvoq, Tanja Nielsen oqarpoq.
Inuussutissarsiornermili attaviit qassiiusut kalaallit suliffeqarfiinut iluaqutaallutillu Kalaallit Illuutaanut soqutiginnitsitsisarput.
- Susassaqarfimmi tassani takussaassagutta amerlasoorujussuit peqataassapput, taamaalilluni inuuniarnikkut ajornartorsiuteqartut ilinniartullu kisimiissanngillat. Aamma inuussutissarsiornermik suliffeqarfeqarpoq, taamaalilluta nunarput tassani takussaatissavarput, Tanja Nielsen oqarpoq.