Kalaallit Illuutaat qarasaasiaq atorlugu inuiattut ullorsiortitsiniartoq
Danmarkimi inuit 50-it amerlanerusut katerinnissaat suli inerteqqutaavoq.
Tamanna pissutigalugu Danmarkimi Kalaallit Illuutaasa pisarneq malillugu inuiattut ullorsiornitsinnut qaaqqusinissaat ajornakusoorpoq.
- Katerinnissamut inuit 50-init amerlanerunissaanut inerteqquteqarneq pissutigalugu peqataanissamut itigartitsisariaqassaagut. Taamaaliorusunngilagulli, Aarhusimi Kalaallit Illuata pisortaa, Tanja Nielsen oqarpoq.
AAMMA ATUARUK Nunatsinniit nunatsinnullu angallanneq: Qanermut assiaqut, immersugassaq-Sumut misissortinnerlu
Taamaammat Kalaallit Illuutaasa sisamaasut nalliuttorsiorneq qarasaasiat aqqutigalugit malunnartinniarlugu aalajangerpaat.
Assigiinngitsunik aallakaatitsisoqarneratigut pissaaq, tamannalu illuutit ataatsimut nittartakkagaatigut groenlandskehuse.dk-ikkut malinnaaffigineqarsinnaavoq.
Juunip ulluisa 21-anni ullaarnganiit Danmarkimi nunatsinniillu kalaallit peqatigiiffiinit, politikeriinit kulturikkut suliaqartuinit videokkut inuulluaqqussutit tamanit takuneqarsinnaassapput.
Katerinnissaq pisariaqarluinnartoq
Aammattaaq illuutit namminneq facebookimi qupperneratigut soqutiginnittut iniminnit malinnaasinnaapput.
- Pitsaanerpaanngilaq, kisianni nalliuttorsiunnginnermit pitsaaneruvoq, Tanja Nielsen oqarpoq.
Pingaartumik inunnut coronavirusip aarlerinarnerata kingunerisaanik upernaaq manna kisimiingaatsiarsimasunut.
- Corona tigusingaatsiarsimavoq, tamannalu aamma kiserliortunut suli kiserliortitsinerulerluni. Taamaammat inuiattut ullorsiornermik takkuttoqarsinnaatitsisinnaannginnerput suli ajuusaarutiginerungaatsiarparput, taanna oqarpoq.
Taassumali eqimattani ikittukkaani naapilluni Kalaallit Illuutaasa nittartagaanni assigiinngitsuni malunnartitsinermut malinnaanissaat kaammattuutigaa.
- Inuit taamaalillutik takuneqartutut allanillu takunnittutut misigisinnaapput, Tanja Nielsen oqarpoq.