Paviap kunngissamut neriorsuutini puigunngilaa: Kunngikkormiup qajassaa Nuummi piareerpoq
Peqatigiiffik Qaannap Nuummi siulittaasua Pavia Tobiassen kunngissaq Frederimmut uuttuussamik qaanniaminik naalagaaffiup sinniisoqarfianut sapaatip akunnera kingulleq nassiussivoq.
Pilersaarutaagaluarpoq imarsiut inussaminut ilisserlugu sanaaq inussaanut Royal Runeqarnera juunip aallaqqaataani pisussaq iluatsillugu inussaminut tunniunneqassasoq. Arpannissarli taanna allarpassuit assigalugit corona pissutigalugu kinguartinneqarpoq.
Piffissaq siornaassuarmut kinguartilaaqqaassavarput oqaluttuap aallartiffia tikissagutsigu.
Pavia Tobiassen arlaleriaqalun nunarsuarmi sisoqqannerit sakkortunersaanni Arctic Circle Racemi Sisimiuni pisartumi peqataasarpoq. 2016-milu peqataavoq ukioq taanna kunngissaq aamma peqataasoq.
AAMMA ATUARUK Nuummi Royal Runertoqarnissaa aggustimut kinguartinneqartoq
- Periarfissaq iluatsillugu kunngissaq oqaloqatigalugu aperaara kalaallit qajaat misilissimaneraa. Taamaasiorsimannginnerarpoq, Pavia Tobiassen oqaluttuarpoq.
- Taava oqarfigaata qimussersinnaaguni aamma kalaallit qajaat misilittariaqaraa, tamannalu isumaqataaffigaa, Pavia Tobiassen oqarpoq.
Inuanut uuttuussaq
Kunngissamik qaanniussiumalluni saaffiginnissut pisortatigoortoq ukioq naalagaaffiup sinniisoqarfia aqqutigalugu nassiunneqarpoq, sivitsorianngitsorlu kunngikkormiuniit akuersaartumik akissutisipput.
Kalaallit qajaat inuttaanut uuttuussamik sananeqartarpoq, kunngikkormiullu qajassaa aamma taamatut sananeqarpoq.
- Kunngissap qitianiit seeqquinut aamma qitianiit isigaasa nuuinut uuttuutit piumavakka. Tassa qajaq inussaanut naleqqutsinniaraani uuttuutit pingaarnerit. Erininarserianngitsorlu uuttuutit taakku nassiuppaat, Pavia Tobiassen oqaluttuarpoq.
Sapaatip akunnera kingulleq qaanniorneq naammassivoq eqqaaneqareersutullu naalagaaffiup sinniisoqarfiani inissikkallarneqarluni.
- Pilersaarutaagaluarpoq tunniussineq juunip aallaqqaataani Royal Runeqarnera iluatsillugu pissasoq. Maanna arpannissaq taanna augustip naaneranut kinguartinneqarpoq naatsorsuutigaaralu tunniussineq tassani piumaartoq, Pavia Tobiassen naggasiivoq.
