Nuummi Royal Runertoqarnissaa aggustimut kinguartinneqartoq
Arpatsitsinissaq, Royal Run coronavirus pissutigalugu ukiamut kinguartinneqarpoq.
Kunngikkormiut nittartakkaminni taama paasissutissiipput.
Arpatsitsineq Nuummi maajip 28-anni ingerlanneqartussaagaluarpoq, taannali coronap kipiluttunarnera pissutigalugu aggustip ulluisa 30-annut maanna kinguartinneqarpoq.
Nuummilu Royal Runertoqarnissaanik aaqqissuisup Kim Godtfredsenip tamanna uggornartuunerarpaa.
- Uggornaqaaq. Taama pisoqarnissaa takorloorsimanngilluinnaraluarparput - inuilli inuunerannut tunngassuteqarpoq. Tamanna akuerisariaqarparput, Kim Godtfredsen oqarpoq.
Nuummi arpatsitsisoqarnissaanut inuit 653-it peqataaniarlutik allatsissimagaluarput. Inuilli 1000-it sinnertinnagit Kim Godtfredsen ilorrisimaalernianngilaq.
AAMMA ATUARUK GIF: Nunarsuarmi aalanerpaanngornissatsinnut Royal Run iluaqutaassaqaq
- Suna tamarmi coronap kipiluttunarnera pissutigalugu sapaatit-akunnerini arlallit matuma siorna unippoq. Aggustilli ulluisa 30-at sapaataasussaavoq, taamaammat arpanniartut imaassinnaavoq amerlanerusut. Maanna piareersarnissaminnut piffissaqalerput, aaqqissuuisoq oqarpoq.
Arpatsitsineq Danmarkimi illoqarfinni tallimani ingerlanneqartussaagaluarpoq, tamanna septembarip arfernanut kinguartinneqarpoq.
Ritzau-ip allaaserisaa naapertorlugu inuit katillugit 80.000-it peqataaniarlutik nalunaarsimapput. Arpannermi ungasissutsit pingasuupput, siulleq 1,6 kilometeri, tullia 5 kilometeri kingullerlu 10 kilometeriulluni.
Ukioq manna pingajussaanik Royal Runertoqartussaagaluarpoq. Arpatsitsineq siullermik kunngissap 50-iliineranut atatillugu 2018-imi aaqqissuunneqarnikuuvoq.
Kunngissap siorna arpaqataanissani qiterlunnini pissutiglaugu taamaatiinnartariaqarsimavaa, taamaakkaluartorli Aarhusimi 1,6 kilometerinut pisussimalluni.