GIF: Nunarsuarmi aalanerpaanngornissatsinnut Royal Run iluaqutaassaqaq
Nuummi upernaaru kingumut Royal Runnertoqassaaq tamatumuunakkullu kunngissaq arpaqataassalluni, tamannalu Kalaallit Nunaanni Timersoqatigiit Kattuffiannit (GIF-imit) nuannaarutigineqarpoq.
- Kunngissap taamatut aaqqissuussinera nuannertorujussuuvoq. Uani aaqqissuussinermik suliaqartut attavigivaatigut aperaluta aaqqissuussamut tassunga timersoqatigiit kattuffianiit suleqataasinnaanersugut, tassalu qujarullugu akuersinikuuvugut, GIF-imi generalsekretæeri Jonas Jensen oqarpoq.
Tassami timersoqatigiit kattuffiat nunarsuaq tamakkerlugu kalaallit timiminnik aalatitsinerpaanngornissaat 2030-imi anguniagaraat. Kunngissallu Royal Runimi Nuummi arpaqataanerata timersoqatigiiffiup anguniagaanut ikiuutaassasoq generalsekretæri isumaqarpoq.
- Tassa anguniakkatsinnut naapertuuttorujussuuvoq, iluaqutaangaatsiartussaallunilu. Tassa Kalaallit Nunaat tassaassaaq nunarsuarmi timimik aalatitsinerpaaq 2030-mi. Taamaammat suliniutitsinnut tunngasut amerlanerusunik sammisaqartitsinermi ineriartortitsinermilu tunngasunut taanna tapertaalluartorujussuussaaq.
AAMMA ATUARUK Royal Run kommer til Nuuk
Kunngissaq arpaqataaleruni Nuummi peqataanissaa Nuummiinnaq sunniuteqassanngitsoq kattuffiup qularutiginngilaa, tassami sinerissami aamma kajuminnerulersitsisinnaasorineqarpoq.
- Kisianni aamma pitsaaqutaa uaniippoq suliniutip uuma aamma periarfissaqartippai "side-run"-imik taallugit. Nuup illoqarfiata avataani pisussat, nammineq kajumissusertik aallaavigalugu sinerissami, illoqarfimminni immaqaluunniit nunaqarfimminni suliaqartut aamma periafissinneqassapput.
Royal Run Nuummi maajip ulluisa 28-anni ingerlanneqassaaq.