Kunngikkormiut nunarput avammut nittarsaalluarpaat
Kunngikkormiut umiarsuaat Dannebrog, kunngissakkut qitornaasalu kalaallisuisa assingi, sermersuarmi unnuinerat, kalaaliaqqallu prinsillu arsaannerat.
Tamanna nutaarsiassatigut nunatsinni qallunaat nunaannilu annertuumik sammineqarpoq, kunngissakkullu nunatsinni tikeraarnerat oqallisaanerallu, Kalaallit Nunaata sammineqarneruleranik kinguneqarluni.
AAMMA ATUARUK Kunngissaq Frederik perngarpoq
Kunngikkormiut Kalaallit Nunaata avammut nittarsaanniarneqarneranut atorluarneqarsinnaapput, takornariat Nunatsinnukartartut taamaalilluni amerlineqarsinnaassallutik:
- Kunngikkormiut nunatta naleqassusaanut kusanassusaanullu avammut nittarsaanniarneranut isumalerujussuupput, Visit Greenlandimi pisortaq Anders Stenbakken oqarpoq.
Kunngissakkullu Nunatsinnut tikeraarnerat takornarianik allanik, assersuutigalugu ilaqutariinnik soqutiginnilersitsinnaavoq, Anders Stenbakken nassuiaavoq, takornariat pinngortitamik soqutiginninnerusut saniatigut ilaqutariit soqutiginnilersinneqarsinnaallutik, Stenbakken oqarpoq.
Nunarput ilaqutariinnut sammisassaqarfiusinnaavoq
- Kalaallit ikinngutinnerlutillu eqqissisimanerat kunngikkormiut tikeraaraangamik misigisarpaat. Isumaqarpungattaaq kunngikkormiut Kalaallit Nunaanniikkaangamik ilaqutaariillutik feeriarnissamut periarfissatut isigisaraat.
- Periarfissarlu taanna qallunaat nunaanni takornariartitsisartunit atorneqarsinnaalluarpoq, Nunatta qiianartutut anorlerajuttutullu isigineqarani ilaqutariinnut sammisassaqarfiusinnaanera ersersinneqarsinnaalluni, Anders Stenbakken taama oqarpoq.
Kalaallit Nunaat kusanartumik saqqummiunneqaqattaarpoq
- Kalaallit Nunaat nutaarsiassaqarfinni kusanartumik saqqummiunneqaqattaarpoq, tamannalu qallunaat nunaanni niuerfinni ajunngitsumik malunniuteqarluni, Anders Stenbakken oqarpoq.
Kunngissakkut Kalaallit Nunaannut tikeraarnerat piviusulersaarutitut Danmarkip Radioanit suliarineqarsimavoq, DR-imilu unnugu nalunaaqutaq qulingiluanut isiginnaarneqarsinnaassalluni.
