Kunngissaq Frederik perngarpoq

Pingasunngormat sisamanngormallu pisortatigoortumik pisassaqanngillat, tamannalu atorluarlugu kunngissaq Frederik aavariarpoq. Aavarluarporlu, pannermik perngarami.

- Kalaallit Nunaanni piniarneq misigisassaavoq immikkuullarissoq. Nunami kusanartorsuarmi asiilasuumilu mikisuaqqatut misiginartarpoq.

- Piniarnerlu pissanganartuaannarpoq, tamatigummi pisaqartoqarneq ajorpoq. Tuttut aamma pisarineqannginnissartik anguniartaramikku, kunngissaq oqaluttuarpoq.

Aavarneq kalaallit aavartarnerassut ingerlanneqarpoq. Kunngissap pisani nammineq aattorpaa, namminerlu immap tungaanut nammallugu.

- Kunngissaaneq immikkoortitsinngilaq, nunamimi angallateqanngilaq, kunngissaq oqaluttuarpoq.

Prins Christian aavariaqataavoq
Prins Christian, arfineq pingasunik ukiulik, aavariaqataavoq, misigisaqarluarsimaqisorlu ataataata oqaluttuaraa.

- Tupinnartumik misigisaqarpoq. Umiatsiamik kangerlummukarneq, uumasunik nasinneq, piniarnerlu pissanganartuaannarpoq.

Paggatsitsiumaarpoq
Kunngissaq kalaallit ileqquannik suli amigaateqartoq nuliata tusagassiortunik katersortitsinermi oqaatigaa, tassami suli paggatsitsinnginnami.

Perngartoqarsimagaangammi immikkut ileqqoqartoq tusarsimavarput. Taamaaliorumaarputillu: aningaasanik mamakujuttunillu paggatsitsillutit, kunngissap nuliata Maryp oqarfigaa.