Kulusummi Mittarfeqarfiit piniartut aalisartullu naapilerai
Kulusummi Mittarfeqarfiit maanna qisuariarput, taakkumi Kulusummi piniartut aalisartullu naapittussanngorpaat.
Tamanna Kulusummi aalisartut piniartullu Mittarfeqafimmut naapeqatiserinninneranni pivoq.
Mittarfeqarfiit tusagassiuutinut nalunaarummi taama allapput.
Taakku tankimut nuussinerminni decembarip aappaani 120.000 literisut annertutigisumik sulaarimik kuuttoorput.
Sulaari nunamut, tatsinut imaanullu siaruaappoq. Mittarfeqarfiilli oqarnerat naapertorlugu sulaari 46.000 liiteri milluarlugu katersorneqarsinnaasimavoq. Sinnerali nuna aatsinnagu qanoq ilioriaqqiffigisinnaanagu oqaatigaat.
Kulusummi aaliartut piniartullu pisup kingorna aningaasatigut ikiorserneqarnissaminnik naalakkersuisunut noqqaassuteqarput. Maannamulli suli taarsiiffigineqanngillat. Tamanna KNR-imiit arlaleriarluta allaaseraarput.
Mingutsitsisulli maanna piniartunit aalisartunillu naapinniarneqalerput.
Saaffiginnissut Mittarfeqarfimmiit iliuuseqarfigineqarpoq.
Suliaq pillugu
Mittarfeqarfimmi Kulusummi dieseloliep tankimut nuunneqarnerani 120.000 literi sumut tamaannga kuuppoq.
40.000 literi tatsiniit milluarlugu uterteqqinneqarpoq. Sinneruttorlu 80.000 literi upalungaarsimasut imaanut kuussimassangatippaat, siaruaassimassallunilu.
Kulusummi aalisakkanik tunitsiveqanngilaq, taamaammat puisip amia neqaalu inuussutigineqarpoq.
- Uuliakoortoqarnerata kingunerisaanik puisit Kulusuup eqqaaniittut tammararput, Kulusummi piniartut aalisartullu peqatigiiffiani siulittaasoq oqarpoq.
Taamaammat Kulusummi aalisartut piniartullu aningaasatigut ikiorserneqarnissaminnik naalakkersuisunut qinnuteqarput.
- Piniartut, aalisartut nunaqarfimmilu najugallit oqaloqatigerusoqaagut. Taarsiiffigitinnissamut avatangiisinillu mingutsitsinermut tunngatillugu naalaarusuppagut suleqataarusullutalu. Taamaammat oqaloqatigiinnissamut paasissutissiinissamullu qaaqqusivugut, Mittarfeqarfinni ingerlatsinermi pisortaq Niels Grosen oqarpoq, nangillunilu:
- Pisoq assut ilungersunartutut isigaarput sapinngisarpullu tamarluinnaat pinngortitamik, uumasunik inunnillu ajoqusiineq annikinnerpaatinniarsaralugu.
Pisup kingunitsianngua Mittarfeqarfiit nunalerinermut, imminut pilersornermut, nukissiuutinut avatangiisinullu naalakkersuisoqarfimmiit saliilertoqquneqarput.
Aalisartut eqqugaangaatsiarsinnaasut
Solaarimimmi uuliakoorujussuartoqarmat upernaaru kiatsileriarpat ajornartorsiornerulissallutik, piniartut ilimagaat.
- Kulusuup eqqaa aalisagaqarfissuuvoq, taamaammat aalisartut Kulusummiuinnaanngitsut Kuummiini tunitsivimmut tunisassaminnik tamaani aalisartarput. Taakku aamma arlaatigut eqqugaanissaat ernumanaqaaq.
- Tunumiuusugullu mamarilluartakkagut uillut immallu naasui assigiinngitsut uuliakoorfiup qanittuani katersorneqartartut aamma nerineqarsinnaajunnaarsimassapput, Kulusummi aalisartut piniartullu kattuffianni siulittaasoq, Knud Kilime oqarpoq.
AAMMA ATUARUK Naalakkersuisoq om olieudslip i Kulusuk: Det er alvorligt
Aalisartut piniartullu qanoq annertutigisumik taarsiiffigineqarnissaminnik kissaateqarnerlutik oqaatigerusunngilaat.
Kulusummi aalisartut piniartullu ikiorserneqarnissamik qinnuteqaataat Namminersorlutik Oqartussani naalakkersuisoqarfinnut assigiinngitsunut nuutsitaaqattaarpoq.
Qinnuteqaataat aalisarnermut piniarnermullu naalakkersuisumut, Karl Tobiassenimut (S), siullermik anngunneqareersorlu ataatsimiissutigineqarpoq, Karl Tobiassenilli suliaq taanna isumaginninnermut, suliffeqarnermut nunamullu namminermut naalakkersuisumut, Jess Svanemut (S), tamatuma kingorna ingerlateqqippaa.
Suliarli taanna naalakkersuisut siulittaasuannut, Múte B. Egedemut (IA), ingerlateqqinneqaqqissimammat, taassuma suliaq maanna tigummivaa.
Taassuma oqarnera naapertorlugu aalisarnermut piniarnermullu naalakkersuisup, Karl Tobiassenip Kulusummi aalisartut piniartullu qanimut oqaloqatigiartussavai.
