Kulusummi eqqaavissuaq kusatsiallassimasoq
- Una takornarianut eqqaaviup tungaa alakkarneqarneq ajoraluarpoq. Kisianni eqqaavipput timmisartumik qulaallugu kusanaatsoq ersarissuugami, tikilerluni malunnartussaavoq Kulusuk kusanartingaatsiartoq, Kulusummioq, Bendt Abelsen oqarpoq.
Suliffeqarfik 60 North Greenland Qaqortumi angerlarsimaffeqartoq saliisuuvoq.
Nunaqarfinni illoqarfinnilu mikinerusuni ikuallaaviit qangali pilersinneqarsimasut iluatsinngimmata atorunnaarsimalerput. Taamaammat eqqakkat tipittut uninngaannartorpassuusarput, nunaqarfimmiunut takornarianullu kusanarpallaarneq ajorlutik.
AAMMA ATUARUK Ikuallaavinnut aningaasaliiniarneq alloriarneruvoq pitsaasoq
Eqqakkanik piiaasoqaannanngilaq. Illukut atunngitsut piiarlugit inikui innuttaasunut tanornarianullu alianaarsaarfigineqarsinnaanngorlugit aamma suliarineqarput, pinnguartarfilersuisoqarlunilu.
- Eqqaavik aamma tipeqarami. Uanga Pilersuisumiit igitsiartorlunga tamakku eqqagassarpassuit tipittuusut piiarneqarmata takuara kusanartorujussuuvoq. Assut nuannerpoq, Bendt Abelsen oqarpoq.
Nunaqarfinni eqqakkanik suliaqarnissaq iluatsissimanngilaq
Nunatsinni kommunit tallimat ataatsimoorlutik eqqagassaleriffik ESANI A/S (Eqqaavilerineq Sulisoqarneq Atoqqiineq Nukissiuuteqaarnermilu Ingerlatseqatigiiffik) pilersippaat. Tamatumalu kingunerisaanik Kulusummi saliisoqarpoq.
- Ullumikkut illoqarfippassuit nunaqarfippassuillu kusanaatsortaqartarput. Tassaallutik eqqaavissuit ukiorpassuarni annertusiartortartut, tamannali allanngortinniarneqalerpoq, Kommuneqarfik Sermersooq apriilimi taama nalunaarpoq.
Eqqagassaleriffillu tunumi saliileruttorpoq.
-Nunaqarfinni ikuallaaviit iluatsissimanngillat, taamaammat nunaqarfinni eqqakkat ingerlaannartumik poortornissaat ilinniartitsissutigineqassapput. Umiarsuarmik assartorneqartalerput Nuuliaallugillu ikuallanneqartalerlutik, ESANI A/S-imi pisortaq, Frank Rasmussen oqarpoq.
AAMMA ATUARUK Kommunit eqqagassaleriffimmik ataatsimoorussamik pilersitsipput
Nunaqarfinniit illoqarfinniillu mikinerusuniit eqqakkanik piiaalluni, Nuuliaallugit ikuallanneqarnissaat suliniutinut ilaavoq.
Malinnaalersitsisoq
Kommuneqarfik Sermersuup 60 North Greenland tunumi eqqakkanik saliisillugulu assartuisippaa.
- Ukiut pingajussaat maannakkut tunumi saliivugut. Nunaqarfiit marluk naammassereernikuuagut taava pingajussaat maannakkut ingerlapparput, saliisunik aqutsisoq, Emil Lyberth oqarpoq.
Eqqaavissuup salinneqarnera suli naamassinngikkaluartoq, nunaqarfimmiut suli kusanarsaanerunissamik pilerisulersimapput .
- Pilersuisumi ippassaq saleersuaarpugut eqqarput tamaat. Nunaqarfiup eqqaavia kusatsingaarmat. Aamma taamaattarami una kusatsippat malinnaalersarput allat, Kulusummioq, Bendt Abelsen oqarpoq.