Naalakkersuisoq: Isiginnaartitsisarfimmut aningaasaliinerput naapertuuppoq
(Naqqiut ulloq 07.01.20 nal.: 14:23: Allaaserisami allaqqavoq Nunatta Isiginnaartitsisarfia 2018-imi 7,4 millionit koruuninik aningaasaliiffigineqartoq. 2019-imi aningaasaliinerit 2,5 millionit koruuninik qaffapput. Aappaagu Isiginnaartitsisarfik 8,9 millionit koruuninik aningaasaliiffigineqassaaq. Tamanna eqqortuunngilaq. Tassami 2018-imi aningaasaliinerit 10,4 millionit koruuniupput. 2019-imilu 9,9 millionit koruuniullutik.)
- Ukioq manna ilanngarsimavagut aamma kulturimut allamut aningaasat atornissai siunertaralutigu, Ilinniartitaanermut, Kultureqarnermut Ilinniartitaanermullu naalakkersuisoq Ane Lone Bagger oqarpoq.
Aningaasanut aappaagumut inatsit malillugu Nunatta Isiginnaartitsisarfianut aningaasaliissutaasussat 10 procentimik ikinnerussapput.
Tamanna Nunatta Isiginnaartitsisarfiani pisortap uggoraa, kulturimullu kingunerlungaatsiassasoq oqaatigalugu.
Aningaasanut inatsit 2018: 7,4 mio.(Saniatigut 3 millionit koruunit reservepuljenimit)
Aningaasanut inatsit 2019: 9,9 mio.
Aningaasanut inatsit 2020: 8,9 mio.
Najoqqutaq: Naalakkersuisut
Angalisamaqaat
Nunatta Isiginnaartitsisarfia 2018-imi 7,4 millionit koruuninik aningaasaliiffigineqarpoq. Taassuma saniatigut Reservepuljemit 3 millionit koruunit aningaasaliissutaallutik. 2019-imi aningaasaliinerit 9,9 millionit koruuniupput. Aappaagu Isiginnaartitsisarfik 8,9 millionit koruuninik aningaasaliiffigineqassaaq.
AAMMA ATUARUK Eqqumiitsuliorneq eqqugaarujussuarpoq
- Eqqarsaatigigutsigumi 2018-imi aamma nunatsinni angalasimaqaat uffa aningaasanik annikinnerusunik taamanikkut taperneqarnikuullutik, naalakkersuisoq oqarpoq erseqqissaatigalugulu Nunatta Isiginnaartitsisarfianut aningaasaliissutit annertusut naapertuullutillu.
Kulturikkut aningaasaliisoqartartoq naalakkersuisup eqqaasitsissutigaa:
- Kulturikkut tapiissutaasartunut aamma Nunatta Isiginnaartitsisarfia isiginnaagassianut assigiinngitsunut aalajangersimasunut qinnuteqarsinnaavoq. Tassanilu aamma taperneqartartoq oqaatigisinnaavara.
Kulturimut kingunerlussaaq
Isiginnaartitsinerup nunatsinni qanoq pingaartinneqartiginera nalunartoq, Nunatta Isiginnaartitsisarfiani pisortaq Susanne Andreasen oqarpoq:
- Unammiinnaavissutut misiginarpoq. Uagut suliagut politikkikkut kissaatigineqarlutik pilersinneqaraluartut ataannarnissarput ilungersuutigiuaannartariaqartarparput. Kulturimut kingunerlussaaq. Ikinnernik isiginnaartitsisariaqassaagut, taava immaqa ukiumut ataasiaannaq takutitsisoqassaaq, Susanne Andreasen oqarpoq.
