Kultureqarnermut ataatsimiititaliap KNR-ip nutaarsiassaqartitsiviani tusagassiortut akissarsiaat qaffatsikkusukkai

Kultureqarnermut ataatsimiititaliap Peter Olsen KNR-imi nutaarsiassaqartitsivimmi tusagassiortut akissarsiaannik qaffaanissamik kaammattuuteqarfigaa.

Allattoq Teitur Larsen , Jaaku Lyberth

marsip 10-at 2023 10:45

Nutserisoq Connie Fontain

KNR-ip nutaarsiassqartitsiviani tusagassiortut akissarsiaat qaffanneqartariaqartut, Inatsisartut kultureqarnermut ataatsimiititaliaannit isumaqataaffigineqarpoq.

- Aap, akissarsiat qaffanneqartariaqarsoraagut. Akissarsiammi ajornartorsiutaanerpaapput, taamaammat suleqatigiilluta aaqqiissutissarsiortariaqartugut isumaqarpugut, Kultureqarnermut ataatsimiititaliap siulittaasua, Doris J. Jensen, Siumumeersoq oqarpoq.

Taassuma kultureqarnermullu ataatsimiititaliamiittut sinnerisa kultureqarnermut naalakkersuisoq Peter Olsen Inuit Ataqatigiinneersoq isumasioqatigaat, tassanilu Peter Olsenip akissarsianut qaffaanissaa ilaatigut kaammattuutigineqarpoq.

- Ataatsimiititaliap kultureqarnermut naalakkersuisoq isumasioqatigiinnissamut aggersarpaa, pissutigalugu KNR ilugersunartorsiorluinnartoq ataatsimiititaliamit isumaqaratta. Naalakkersuisut TP-lu aaqqiissutissarsiortariaqartut isumaqarpugut, Doris J. Jensen oqarpoq.

Suleqatigiissitaq

Kultureqarnermut ataatsimiititaliattaaq Naalakkersuisut suleqatigiissitamik KNR-ip unammillernartitaanut ajornartorsiutaanullu aaqqiissutissarsiortussamik pilersitsinissaat kaammattuutigaa.

- Ajornartorsiutaasormi annertunerungaatsiarsinnaavoq. Aamma sulisunut inissanut tunngasinnaavoq. Taamaammat nalunaajaasoqarnissaa suleqatigiissitamillu ajornartorsiutinik nalunaajaasussaqarnissaa pisariaqartoq isumaqarpugut, Doris J. Jensen oqarpoq.

Peter Olsenimmi suleqatigiissitamik taama ittumik pilersitsinissani Suliaqaqatigiit atuagassiaannut Journalistenimut 2022-mi juunimi neriorsuutiginikuuaa.

KNR-IP NUTAARSIASSAQARTITSIVIANUT TUNNGATILLUGU SULIAQ NAATSUMIK

Apriili 2022:

KNR-ip kalaallisut oqaasilinnik tusagassiortussaaleqineq pissutigalugu radioaviisip aallakaatinneqartarisa ikilivai.

Juuni 2022:

Kultureqarnermut naalakkersuisup IA-meersup, Peter Olsenip suleqatigiissitamik, KNR-ip siunissaanik misissuisussamik KNR-illu ajornartorsiutigisaanut aaqqiissutissiisussamik, pilersitsinissani suliaqaqatigiit atuagassiaatigut Journalistenikkut neriorsuutigaa.

Februaari 2023:

KNR-ip radioaviisip aallakaatinneqartarnera sivikinnerutillugulu ikinnerutippai.

KNR-ip nutaarsiassaqartitsiviata kalaallinik sivitsortumik tusagassiortussaalatsinera pillugu politikkikkut iluarsiissutaasinnaasunik nassaarniartoqartariaqalernerarlugu, TP-p siulittaasua, Oline Olsen naalakkersuisunut isornartorsiuilluni sapaatit akunnerata siuliani ammasumik allagaqarpoq.

Oline Olsenip oqarnera naapertorlugu akissaatit appasinnerat tusagassiortutullu allagartallit attaveqatigiinnermik suliaqarfiusuni allani akissaatiginnerusarnerat KNR-ip kalaallinik tusagassiortussaalatsineranut peqqutaanerpaapput.

KNR-ip pisortaata, Karl-Henrik Simonsenip kalaallinik tusagassiortunik atorfinitsitsiniarnermut akissarsiat ajornartorsiutaanerpaasut uppersarnarpaa.

Marsi 2023:

Peter Olsen TP-mut matoqqasumik akissuteqarluni KNR-imi akissarsianut tunngatillugu akulerussinnaanani oqaatigaa.

Sulinermik Inuussutissarsiuteqartut Kattuffiata siulittaasuata, Jess G. Berthelsenip politikerit tamarmik akuliussinnaanissamut periarfissaqartut nassuiaatigaa.

Inatsisartut kultureqarnermut ataatsimiititaliaata, Peter Olsen KNR pillugu isumasioqatigiinnissamut aggersarpaa, tassangalu akissarsianut qaffaanissaa suleqatigiissitamillu pilersitsinissaa kaammattuutigineqarpoq.

Allisiguk

Maannali qaammatit qulingiluat qaangiuttut neriorsuutini suli eqquutsinngilaa.

Politikerip iliuuseqarnissaata amigaataanera pissutigalugu Tusagassiuinermi Sulisut Peqatigiiffiata siulittaasuata, Oline Olsenip Peter Olsen ammasumik allagaqarfigalugu pissutsit pillugit KNR-imilu akissarsiat pillugit isornartorsiorpaa.

Aamma atuarukTusagassiuinermi sulisut peqatigiiffiata KNR ernumassutigigaa: Politikkikkut iluarsiissutaasinnaasunik nassaarniartoqartariaqalerpoq

Peter Olsenili kultureqarnermut naalakkersuisutut KNR-ip nutaarsiassaqartitsiviani tusagassiortunut akissarsiatigut atugassarititaasunut politikkikkut akuliussinnaanani isumaqarpoq - Sulinermik Inuussutissarsiuteqartut Kattuffiatali siulittaasuata, Jess G. Berthelsenip tamanna isumaqatiginngilaa. Taassumami akuliuttoq takujuartarsimallugu KNR-imut oqaatigaa.

Peter Olsen qanoq oqarpa?

Kultureqarnermut ataatsimiititaliap TP KNR-imi nutaarsiassaqarfimmi pissutsit pillugit talliamanngornermi ataatsimeeqatiginiarpaa. Akissarsiallu uani oqaluuserineqassallutik.

Peter Olsen KNR-imit apersorneqarusunngilaq. Taassuma isumasioqatigiinnermi aaqqiissutissatut siunnersuutersi qanoq oqaaseqarfigaa?

- Isumasioqatigiinnerit matoqqasuunissaannut ingerlatseriaaseqarpugut, taamaammat isumasioqatigiinnermi qanoq oqarsimanera pillugu oqaaseqarsinnaanngilanga, kisianni tusagassiuutinut nalunaarutigisarput innersuussutigisinnaavara, Doris J. Jensen oqarpoq.

Tamannali Peter Olsenip qanoq iliorusunneranik oqaaseqarfiunngilaq?

- Naalakkersuisoq suleqatiginnikkusuttoq oqaatigisinnaavara.

Taava imaappa kultureqarnermut ataatsimiititaliap qanoq iliornissamut isumaqarneranik malinnikkusuppoq?

- Qanoq isumaqarnini nammineq oqaatigisinnaavaa, kisianni suleqatigerusukkaatigut oqaatigisinnaavara.

Naalakkersuisoq Peter Olsen apersorneqarusunngilaq. Taassumali ataatsimiititaliami ataatsimiinneq matoqqasuuusoq ataatsimiititaliamilu ilaasortanoortuinnaasoq allappaa. Taamaammat ataatsimiinnerup imarisaa pillugu oqaasissaqarani.