Kujataani suliffeqarfiit ilaat coronavirusi pissutaalluni akiliisinnaajunnaarsinnaasut
Peqqinnissaqarfik innuttaasullu peqqissusaat kisimik coronavirusimik eqqugaanngillat. Nunatsinni inuussutissarsiorneq nunarsuarmi nappaalaanermit inuiaqatigiinnilu killilersuinerpassuarnit iliuuserpassuarnillu eqqugaapiloorpoq.
Minnerunngitsumik Kujataani suliffeqarfiit ikiorsiissuteqarfigineqanngikkunik taakkunani sisamaagaangata ataaseq coronavirusimik ajornartoorneq peqqutaalluni akiliisinnaajunnaarsinnaasoq, Kujataani suliffeqarfiit 39-it pillugit misissuinerup takutippaa.
Ikiorsiissutit nunatsinni suliffeqarfiit coronavirusimik ajornartoornermi aniguinissaannut iluaqutaassapput. Aningaasat taakkua soraarsitsinissaraluanik pinngitsoortitsissutaaassallutillu aningaasarsiatigut annaasanut taartisiassanut atorneqassapput.
50 millionit koruunit namminersorlutik inuussutissarsiortunut aammalu kiffartuussinermik, neriniartarfiuteqarnermik takornariaqarnermillu inuussutissarsiutilinnut ikiorsiissutiginasuaatigineqassapput.
100 millionit koruunit ilaatigut aalisarnermik, angallassinermik sanaartornermillu inuussutissarsiutilinnut atorneqassapput.
107 millionit koruunit sulisut angerlartitat soraarsitaaqqunagit taakkua aningaasarsiassaannut atorneqassapput.
Suliffeqarfiit akileraarutinut akitsuutinullu akiliinissaannik kinguartitsineq. Tamanna nunatta karsianut qaammammut 250 millionit koruuninik akeqartassaaq.
Suliffeqarfik Innovation South Greenland, Kommune Kujallermi inuussutissarsiornermi ineriartortitsinermik ilaatigut suliaqartoq, misissuisuuvoq, misissuineratalu takutippaa, pissutsit ilungersunarsereersimasut.
Inuit 150-it aasaanerani suliffeerussinnaasut
Kommune Kujallermi suliffeqarfinni sulisuni 60-it angerlartitaagallarlutilluunniit suliunnaarallartitaapput.
Ajornartoorneq aasaanerani qaangiutinngippat inuit 150-it suliffeerutissasut, suliffeqarfiillu kaaviiaartitaminnit agguaqatigiisillugu 1,3 millionit koruunit annaassagaat, misissuinermi paasisat takutippaat.
AAMMA ATUARUK Coronap ajornartorsiortitsinera: Inuussutissarsiutit milliardip affaanik ikiorserpaat
Innovation South Greenland naapertorlugu naalakkersuisut ikiorsiissutissaat taamaattumik pisariaqartinneqaqaat.
Akileraarutinut akiliinissanik kinguartitsineq iluaqutaassaaq
Ikiorsiissuteqarneq milliardit affaasa missaannik akeqarsinnaavoq, aningaasallu taakkua suliffeqarfiit sulisuisa angerlartitat soraarsitaaqqunagit aningaasarsiatigut annaasanut taartisiassaannut ilaatigut atorneqassapput.
Ikiorsiissutillu ilaat suliffeqarfiit coronavirusimik ajornartoornikkut isertitassaminnit annaasaannut ilaatigut aamma atorneqassapput.
AAMMA ATUARUK Sulisitsisut: Ikiorsiissut suliffeqarfinnut ingerlanerliortunut amerlasuunut annaassissaaq
Ikiorsiissutissani suliffeqarfiit akileraarutinut akiliinissaannik kinguartitsinissaq aamma ilaavoq. Tamannalu iluaqutaassasoq, suliffeqarfiit misissuinermi peqataasut amerlanerpaartaat isumaqarput.
Ikiorsiissutigineqartussanngortulli naammannersut alaatsinaannissaat pingaaruteqartoq, Innovation South Greenlandip erseqqissaatigaa.
