Kujataani sikunik alapernaarsuinerup nutarsarneqarnera isumannaannerulersitsissasoq
Umiarsuit Kujataata imartaani sikusiortarnerat isumannaannerulerlunilu ajornannginnerulissaaq.
Maannamiimmi ullut tamaasa sikoqarneranik qaammataasamit assilisat Kujataani imaatigut angallanneq isumannaannerulersissavaat. Danskit Nukissiuuteqarnermut, pilersuinermut silallu pissusianut ministeriata Lars Chr. Lilleholtip teknologii nutaaq nersualaarpaa:
- Kujataani imaatigut angallannerup isumannaannerulersinneqarnera nuannaarutigisupilussuuara. Inuussutissarsiortunut takornariaqarnermullu pingaaruteqartupilussuuvoq. Tamatumunngalu peqatigitillugu paasissutissanik pitsaanerusunik akulikinnerusumillu pissarsisalissaagut, silap qanoq innera qaammataasanut apeqqutaanngimmat taartumilu aamma atorneqarsinnaammata, Lars Chr. Lilleholt taama oqarpoq.
AAMMA ATUARUK Narsarsuarmi sikunik alapernaarsuiffik matuneqalersoq
Sikut allanngorarneranik nalunaarsuineq siornatigut DMI-p sikunik alapernaarsuisuinit Narsarsuarmiittunit sapaatit akunneranut marloriarluni qulimiguulimmik ingerlanneqartarpoq. Silalli ilaanneeriarluni allanngorarsinnaanera pissutigalugu tamatigut qulimiguulimmik aallarsinnaasarsimanngillat. Tamanna maanna qaangerneqarpoq. DMI-mmi sikunik alapernaarsuiviata sikut allanngorarnerat siunissami sukkanerusumik takusinnaalissavaa, qaammataasanit assilisat ullormut arlaleriarlutik pissarsiarineqartassammata. Qaammataasanit assilisat niuaqaraluarpat taaraluarpalluunniit pitsaasuupput.
Qaammataasat atorlugit teknologii taamaalilluni umiarsuarnut takornariartaatinut amerliartuinnartunut Kujataata imartaani ukiuni makkunani angalasartunut isumannaallisaanikkut annertusaataassaaq.
/ritzau/