Kujataani immap naqqatigut kabeli iluarsaanneqalersoq
Kujataani immap naqqatigut kabeli, siorna decembarip 27-anili ajoqusertoq, aggustimi iluarsaanneqartussanngorpoq. Iluarsaanneqarneranilu kujataani internetimut attaviit sapaatit akunnerit pingasut tikillugit qaminngatinneqassasut, Tele-Postimiit ilisimatitsipput.
Paamiuniit Narsarmijit ilanngullugu
Immap naqqatigut kabelip Qaqortumiit Islandimut attaveqaataa siorna decembarimi ajoquserpoq. Tele-Postip naatsorsuutigaa kabeli aggustip sisamaaniit aaqqissorneqassasoq.
AAMMA ATUARUK Islandimut imaatigut kabelip attavia ajoquteqartoq
AAMMA ATUARUK Umiarsuarmik aaqqissuiartortussamik suli nassaanngilavut
- Taamaalilluni (kujataani, aaqq.) atuisunut attaviit qaminneqaqqissapput naatsorsuutigaarpullu ullut 15-iniit 20-t tungaannut sivisussuseqassasoq, attaveqaqatigiinnermut sulisoq, Paarnaq Hansen, oqarpoq.
Tassa Paamiuniit Narsarmijit ilanngullugit internetimut attaviit aggustip sisamaaniit qamikkallarneqartussanngorput.
Kabelit ajoqusertut
- Kabeli Sisimiunit 30 kilometerisut kujasitsigisumiittoq januaarimi ajoquserpoq.
- Kabeli Sisimiunit 70 kilometerisut avannarpasitsigisumiittoq ajoquserpoq.
- Tamarmik iluarsaanneqareerput.
- Nunatta kujataani kabeli decembarimi ajoquserpoq.
- Immap naqqatigut kabeli 300-400 meterinik ititigisumi siaarneqarpoq.
Tele-Postimeersut, kujataani maajip qaammataani sikoqarpallaarmat silarluppallaarmallu, kabelimik aaqqissuisitsinertik taamaatikkallarpaat. Aggustimili akornuteqannginnerunissartik naatsorsuutigalugu franskit umiarsuaannik, Ile d’Aiximik, aaqqissuiartortitsissapput.
- Aggustimullu kinguartipparput silap ajunnginnerunissaa sikorsuaqannginnissaalu naatsorsuutigalugu, neriuutigaarpullu ingerlalluarnerussasoq.
Akiliutigisimasat utertinneqassasut
Immap naqqatigut kabelit nunatsinni sumiiffinni assigiinngitsuni pingasuni, tassa Sisimiut eqqaani Qaqortullu eqqaani, ukioq manna ajoquserput, iluarsaassinernilu internetimut attaviit qaminneqarallartarlutik.
Kujataanilu atuisut internetimut akiliutigisaminnik taarsiivigineqassasut, Tele-Post neriorsuivoq:
AAMMA ATUARUK Internetimut attaveeruttoortoqaqqinnginnissaa Tele-Postip neriuutigaa
- Kingullermisut periuseqassaagut, ullut qaminngaffii qassiunersut apeqqutaallutik aningaasanik utertitsiumaarpugut,Tele-Postimi attaveqaqatigiinnermut sulisoq, Paarnaq Hansen, oqarpoq.
Kujataani internetimut attaviit qaminngatinneqassapput, kisianni politeeqarfiit, peqqinnissaqarfiit assigisaallu internetimut attavii ikumatiinnarneqassasut, taassuma ilanngullugu paasissutissiissutigaa.
