Kommune Kujalleq: Borgmesterip kajumissutsiminnik suliallit nersorpai
Kommune Kujallermi borgmesterip, Kiista P. Isaksenip, Kommune Kujallermi innuttaasut kommunimik ineriartortitseqataasut ukiortaami oqalugiarnermini nersorpai. Ilaatigullu nunaateqarneq aatsitassarsiornerlu pillugit ineriartitsisoqaqqissasoq aamma oqaatigaa.
Borgmesterip Kommune Kujallermi innuttaasut assigiinngitsutigut sulinermikkut kajumissutsiminnik suleqataasorpaaluit eqqaavai, erseqqissarlugulu taakkua kommunimi anguniakkanik pilersitsinermut ataatsimoortitsinerulernermullu pingaaruteqartut.
Nunaateqarneq pillugu tunngaviusumik aaqqissuusseqqinnissaq aamma erseqqissumik politikkeqalernissamik sulissuteqartoqarnissaa minnerunngitsumillu inuussutissarsiummut tassunga inatsisitigut naleqqussaasoqarnissaa aamma kissaatiginerarpaa.
AAMMA ATUARUK Kujataani inuussutissarsiutinik ineriartortitseqatigiiffittaaq pilersinneqartoq
- Piffissanngorluinnarpormi nunatta pissarititaanik atorluaanissatsinnik imminullu pilersornerulernissatsinnut siuarsaallutalu annertusaanissarput, kujataata nerisassaasivissuartut nukittorsartuarnera tamatsinnut iluaqutissanngorlugu, Kiista P. Isaksen oqarpoq.
Narsamilu Neqi A/S-imi ukioq naallugu sulifinnik ataavartunik pilersitsisoqarnissaa anguniarlugu Neqi A/S-ip pisortaanera tunisassiorfianilu ingerlatsisoq suleqatigiinnerulernissartik isumaqatigiissutigisimagitsik aamma oqaatigaa.
Mittarfiliornissaq isumalluarlersitsisoq
Mittarfiliornissaq soorunami aamma eqqaavaa. Qaqortumilu mittarfittaarnikkut Kujataata tikikkuminarnerulernissaa takornariaqarnikkut inuussutissarsiornikkullu ineriartortitsinissat ammaanneqassasut aamma oqaatigaa.
AAMMA ATUARUK Kommune Kujalleq inissianik sanaartortoqarnissaanut aningaasaliissuteqarnerulissaaq
Kujataani aatsitassarsiorfiit suliffinnik assigiinngitsunik pilersitsiviusussaammata qalluinissamut akuersissummik piaarnerpaamik tunineqarnissaat Kommune Kujalliup ilungersorluni qulakkeerusuppaa.
Isumatuunik aamma oqaaseqalaarpoq. Tassa Kommune Kujallermi sulisunut, suleqatinut kajumissutsiminnillu sulialinnut inuulluaqqusinermini Ulf Fleischerip taalliaa issuarpaa:
”Piumassusermik ilunniittoqartillugu artornanngilaq anguniagaq, ikinngutinnernerlu naapittuartillugu artorsaatikka nunguttuusisaraat. Siaruaatsigu naliligarput taanna, nunamut maanga inuinullu. Qungujugit, taperserumma maanna timinnut aamma malunniutissavoq".
- Taalliami oqaatsinut imartuunut qujallunga ukioq nutaaq aallartittoq ukiumi qaangiuttumi angusimasagut nukissaqalersitseqqittut ingiaqatigalugit alloriaqqippugut, borgmesteri naggasiivoq.
Borgmesterip, Kiista P. Isaksenip, ukiortaami oqalugiaataa uani isiginnaarlugulu tusarnaarsinnaavat: