Kujataani inuussutissarsiutinik ineriartortitseqatigiiffittaaq pilersinneqartoq
Ineriartortitsiffik Innovation South Greenland A/S Kommune Kujallermi inuussutissarsiutinik ineriartortitsissaaq.
Qaqortumi mittarfittaassaq ilaatigut
inuussutissarsiornikkut siuarsaaqataassaaq.
Allattoq Mette Nørmark, Bikki P. Kleist
septembarip 12-at 2019 16:45
Ingerlatseqatigiiffik Kujataani inuussutissarsiornikkut ineriartortitseqataassaaq. Ingerlatseqatigiiffik aqqutigalugu kommunip ineriartorneranut inuussutissarsiutinik ingerlatallit akisussaaqataanissaat sunniuteqaqataanissaallu qularnaarneqassaaq.
Kommune Kujalleq taama nalunaaruteqarpoq.
- Nuannaarutigaara inuussutissarsiutinik ingerlatallit kommunillu pitsaasumik suleqatigiillutillu oqaloqatigiiffissaqalermata. Suleqatigiinnitsigut siunissami suliat pilersitassallu iluaqutigisinnaanngussavavut, ataatsimoorlutata suleqatigiilluarnissarput pinngitsoorneqarsinnaanngivippoq, Kommune Kujallermi, borgmesterip tullia siulleq aamma kommunimi inuussutissarsiornermut suliffeqarnermullu ataatsimiititaliami siulittaasoq, Simon Simonsen oqarpoq.
Periarfissagissaarnerulissasoq
- Inuussutissarsiortut kommunillu pitsaasumik suleqatigiinnerisa saniatigut Kujataani inuussutissarsiutinik ineriartortitsineq inuussutissarsiutinillu ingerlatallit pisariaqartitaat naammassisinnaajumallugit pilersaarusiorneq pisariaqarpoq, ingerlatseqatigiiffittaami siulersuisuni siulittaasoq Rasmus Christian Rasmussen oqarpoq.
Innovation South Greenlandip siulersuisui tassaapput: Nanortalimmi, Narsami, Narsarsuarmi, Qaqortumilu inuussutissarsiortunik ingertallit kiisalu Simon Simonsen Kommune Kujalleq sinnerlugu ilaasortaasoq.
Naatsorsuutigineqarpoq Kommune Kujallermi aatsitassarsiornermut suliniut piiaanissamut akuersissummik qanittukkut pissarsiumaartoq.
Takornariartitsinerlu ineriartortinneqarlunilu nittarsaanneqassaaq takornariartitsisut Visit Greenlandilu suleqatigineqassapput aamma kujataani tunisassiorfiit aalisartullu iluaqutissaannik aalisarneq ineriartortinneqarlunilu nukittorsarneqassalluni.