Kujallermi qinikkat Narsarsuaq matoqqunngilaat

Knud Kristiansenip Narsarsuup mittarfiata matuneqarnissaa imaluunniit atornerata annikillinissaanut pilersaarutini sapaatip akunnera kingulleq saqqummiummagit taakkuupput kommunalbestyrelsimi ilaasortat ilaannit qisuariaataasut.

Kommune Kujallermi kommunalbestyrelsimi atassut sinnerlugu ilaasortatuaasoq Josef Petersen parteeqatimi Knud Kristiansenip kujataani silaannakkut angallannermut tunngasunut pilersaarutaanut isumaqataanngilaq:

- Isumaqatiginngilara, Narsarsuup arlaatigut annikillisaavigineqarnissaa immaqaluunniit atorunnaarsivinneqarnissaa. Atlantikoq qulaallugu mittarfiuvoq pitsassuaq angisooq, taamaattumik isumaqarpunga kujataani annaasariaqanngikkipput, aamma suliffippassuarnik naleqarmat.

Kommune Kujallermi kommunalbestyrelsemi ilaasortat partiinit pingasuneersuupput. Siumumiit Inuit Ataqatigiinniillu ilaasortaasut narsarsuup matuneqarnissaa aamma kissaatiginngilaat.

- Uagut kissaatiginngilluinnarparput mittarfiup matuneqarnissaa. Soorunami annikillineqarluni ingerlasinnaanera aamma taanna periarfissaavoq, kisianni soorunami ingerlaannarnissaa uagut aamma kissaatigigaluaqaarput, Simon Simonsen Siumumeersoq taama oqarpoq.

Narsarsuullu matuneqannginniassammat Kommune Kujallermi siornaak ataatsimiitsitaliortoqarpoq.

- Mittarfittaarnissaq Qaqortumi nuannaarutigigaluarlugu, narsarsuup arlaannut atorfissaqarnera uagut upperigatsigut arlaannut atorusoqaarput, Kelly Berthelsen Inuit Ataqatigiinneersoq taama oqarpoq.

Kinguneqassaaq

Narsarsuaq matuneqassagaluarpat aningaasatigut kingunissai pillugit misissuisitsineq saqqummiunneqaqqammerpoq. Misissuisitsinermi ilaatigut erserpoq takornarianit aningaasat isaatinneqartartut annaaneqassasut.

Mittarfimmilu sulisut suliunnaarpata akileraarutitigut isaatittagat Kommunimut annaasaqaataalissasut Josef Petersenip maluginiarpaa:

- Kommuunitsinnut nakkartartut tamaavimmik nungungajaavittussaapput qamarmik qaqortumi sulilersinnaanngimmata. Taamaattumik isumaqarpunga Narsarsuaq piorsarlugu ingerlattariaqaripput, Josef Petersen oqarpoq.

Nuannaarutaavoq

Nunatsinni angallannerup tungaatigut ineriartorneq kujataani malunniutinnginnera kommunimi qinikkat nalaattarpaat.
Qaqortup Narsallu akornanni mittarfiliornissamik pilersaartoqalerneranik nutaarsiassaq taakkunanit nuannaarutaavoq:

- Saqqummiunneqarpoq unammillertoqalersoq, kisianni paamiut kisiat tikillugu timmisartuussinermi neqeroorutit ingerlassapput. Taavalu kujataani qaqortoq ilinniarfeqarfissuaq aamma angallaffiusorujussuaq taamaalilluni avataaniissooraasiit. Tassa tamakku eqqarsaatigalugit kommunalbestyrelsimi amerlanerussuteqartut qaqortumi mittarfeqalernissaa kissaatigivaat, Simon Simonsen oqarpoq.

Inuit Ataqartigiinneersup kommunalbestyrelsini ilaasortaasup mittarfiliortoqarpat kujataani ulluinnarnut pitsaasumik sunniuteqassasoq isumaqarpoq.

- Uagut kujataani mittarfilinnut sanilliulluta kulturikkut neqeroorutinik  amigaateqartorujussuusarpugut. Aamma soorlu napparsimaveqarfimmi angallassiniarneq silamit sunnerneqaqqajaasarpoq helekoptereeqqat atorneqartarmata. Qaqortoq ilinniartoqarfissuanngornikuuvoq, kisianni angalaniarneq ilungersunartorujussuuvoq. Tamakku eqqarsaatigalugit mittarfittaarnissaq qaqortumi inuppassuarnut iluaqutaasussaavoq, Kelly Berthelsen oqarpoq.