Kuinerrami kulturimut illoqalersoq

Kulturimut illumi nutaami sakkut tusintilikkuutaat nunaqarfitoqqami Kuinerrap eqqaaniittumi Nunallermi nassaarineqarsimasut takuneqarsinnaapput.

Yuppit sakkut matoorussaasimasut qaqikkusuttanngikkaluarpaat. Taamaammat sakkut tamakkua 60.000-it missaanniittut 1500-ikkunnili nunami matooruteqqaannarsimapput.

Silalli pissusiata allanngoriartorneranit sissap iliveqarfitoqqallu nunaqarfiup eqqaanniittut neriorneqalerput, matuukkallu puttussuutilerlutik.

Sakkutoqqallu tupinnaannarput! Puisinniarnermi sakkut, aarnuat, aarrit tuugaavinit uiguleriiliaq kusanarluinnartoq, ilusilersugaaqqat, ivikkanik ikaartiterlugu allunaasaliat allarpassuillu.

Sakkut katillutik 60.000-it missaanniittut nassaarineqarput.

Taakkulu yuppit sakkuini nassaani pisoqaanerpaallutillu allanngorsimannginnerpaapput.

Nunaqarfiup siulittaasuata, Warren Jonesip,  Anchorage Daily Newsimut oqaatigaa, soorlugooq siuaasami sakkorpassuit kinguaariinnut takuneqarsinnaasussanngorlugit toqqorsimagaat.

Assaaneq Skotlandimi Aberdeen Universitetip Alaskallu suleqatigiinnerisigut ukiuni arfineq-pingasuni ingerlanneqarpoq.

Assaaneq kulturimullu illu nutaat takornariarpassuarnit maanna ussatigineqalereerput.

Tamannalu nunaqarfiup inuinut 700-nut aningaasanik nutaanik isaatitsinissamut periarfissiivoq, Jonesillu oqarneratut tamanna piorsarsimassutsitsinni aamma tulluusimaarutiginninnerulersitsivoq.