Politikki Avatangiisit

Kuannersuarni saffiugassiassatoqaq Roskildemi aarleqqutigigaat

Saffiugassiassatoqaq uranitalik Kujataani Kuannersuarneersoq Roskildemiittumi Risømiikkallassaaq. Illoqarfimmili pisortat eqqakkanit kuuttoqalernissaa aarleqqutigaat.

Allattoq Helle Nørrelund Sørensen

oktobarip 24-at 2017 12:47

Nutserisoq Erna Lynge

Misiligaaviusimasumi Roskildep eqqaaniittumi Risømi suli ukiuni 30-50-ni atomimik eqqakkat uninngatinneqarallassapput. Aatsaallu tamatuma kingorna nunanut allanuugunartoq eqqakkat inissinneqarumaarlutik.

Danskit naalakkersuisui septembarimi ukioq manna taama siunnersuuteqarput.

Taamatulli aalajangerneq Roskilde Kommunimit assorsuaq isorineqarpoq. Pilersaarutimmi malillugit eqqakkanut toqqorsivik aatsaat kingusinnerpaamik 2023-mi allamut nuunneqassaaq.

Illoqarfimmi pisortat isumaqatigiillutik ilinniartitaanermut ilisimatusarnermullu ministerimut Søren Pindimut allapput:

- Eqqakkat radioaktiviusut Risømiitiinnarneqarniissaannut Naalakkersuisut siunnersuutaanni sillimaffigineqarsimanngilaq siusinnerusukkut misissuinerit takutissimammassuk Risø radioaktiviusunik toqqorterivissatut naleqqutinngitsoq, saaffiginnissummi allassimavoq.

AAMMA ATUARUK GME bliver bedt om foretage flere miljøundersøgelser

Saffiugassiassat uranitallit nunamiiginnartut

"Eqqakkanik" allannermi pineqartut tassaapput saffiugassiassatoqqat uranitallit tonsinik tusindtinik arlalinnik oqimaassusillit, 1970-ikkunni -80-ikkunnilu Kujataani Kuannersuarniit Danmarkimi atomip nukinganik misiligaanermut atorneqarsimasut.

Saffiugassiassatoqaq Risøp eqqaani nunap qaavaniiginnarpoq, misissuinermilu erseqqissaatigineqarsimavoq pinngoqqaatit ilaannik fluoridimik nuna eqqaaniittoq avatangiisinut ajoqutaasinnaasumik akoqarnerulersimasoq.

AAMMA ATUARUK GME-p pisortaata VVM-imut missingiutip isornartorsiorneqarnera akerlileraa

Naalakkersuisut siunnerfigaat eqqakkat ilaasa mingutitsinnginnerini eqqanaarsakkamut nuunneqarnissaat. Maannamulli erseqqissaatigineqasimanngilaq saffiugassiassatoqqaq eqqakkatut naatsorsuussaanersoq.

Illoqarfimmili pisortat aalajangiissappata eqqagassat tamarmik allamut nuunneqartariaqarput.

- Eqqakkat tamarmik eqqakkallu radioaktiviusut tamarmik Risømit peerneqartariaqartut kommunimi partiit tamarmik Søren Pindimut allapput.

AAMMA ATUARUK VVM-ip saqqummiunneqarnera innuttaasunik sullissineruvoq