NGO: VVM-ip saqqummiunneqarnera innuttaasunik sullissineruvoq
- Kuannersuarni pilersaarusiap avatangiisinut sunniutissai inunnut amerlanernut assorsuaq soqutiginartuusut isumaqarpugut.
Avatangiisinik illersuiniaqatigiiffimmi NOAH-mi oqaaseqartartoq Niels Henrik Hooge taama oqarpoq. Taakku suliniaqatigiiffiit allat arfinillit peqarigalugit Kuannersuarni aatsitassarsiornissamut nalunaarusiamut allaqqitassaq VVM tamanut saqqummiuppaat.
Nalunaarusiap VVM-ip imarivaa Kuannersuarni aatsitassarsiortoqalissappat avatangiisinut sunniutissai.
Naak nalunaarusiaq allaqqitassaagaluartoq pisariaqaateqartoq taanna isumaqarpoq.
- Kuannersuit pillugit GME-p nalunaarusiaani siusinnerusukkut saqqummersittarsimasaaniit allaaserisaq allaanerunngilaq. Uagullu paasinnittaaserput malillugu allaaserisaq naammassineqaruni allannguuteqarpallaarnavianngilaq.
Suliniaqatigiiffiup nalunaarusiaq allaqqitassaq DR-miit pissarsiarisimavaa. Taakku ukiarmi Namminersorlutik Oqartussanut suliaq pillugu pisortat paasissutissaataannik tamakkiisumik allakkatigut paasissutissinneqarnissamik qinnuteqarlutik taanna pissarsiarisimavaat.
Taamatulli takunnissinnaatitaaneq Namminersorlutik Oqartussat kingorna atorunnaarsikkaluarpaat - taamaalineranili paasissutissat avatangiisinik illersuiniaqatigiiffiit pissarsiarereersimavaat.
Taamaattumik suliniaqatigiiffiit aalajangersimapput nalunaarusiaq tamanut saqqummiunniarlugu, Niels Henrik Hooge oqarpoq.
- Taama iliornitsigut inunnik amerlanernik sullissivugut - GME-mut Namminersorlutik Oqartussanullu - taakkumi isummatta isummerfiginissaannut periarfissaqalerput. Taamaasiunngikkutta suliat pillugit sapaatit akunnerisa arfineq pingasut ingerlaneranni tuaviinnaq tusarniaaffigineqarsimassagaluaratta. Taamaattumik nuannaarutigaarput sapaatit akunneri arfineq pingasuinnaat atornagit, qaammatini tallimani eqqissilluta immikkut ilisimasalinnik naliliisitsisinnaangatta, Niels Henrik Hooge NOAH-meersoq oqarpoq.
Missingersuut oktober 2015-imeersoq maanna tamanut saqqummiunneqareerpoq.
AAMMA ATUARUK Uranimik suliniutissaq GME-p akueraa - avatangiisinik illersuiniaqatigiit kamapput
