Politikki

Krusep tunuarnissaa Kielsenip ilisimareersimavaa

Naalakkersuisut Siulittaasuat Kim Kielsen Inatsisartut ullumi ataatsimiinneranni nalunaarutigaa Aalisarnermut, Piniarnermut Nunalerinermullu naalakkersuisoq Karl-Kristian Kruse atuuffimminit tunuartoq. Tunuarniuteqarneralu Inatsisartunut tupaallannartuusimasoq, tamanna Naalakkersuisut Siulittaasuata tupaallatiginngilaa.

Allattoq Sara K. Jakobsen, Jonas Fievé

maajip 23-at 2016 18:31

- Ukiorli taanna nalunaarutigigamiuk uannut, tunuarniuteqarnissaminut eqqarsaatersuuteqarluni. Taamaammat soorunalimi nalilersorsimavara, uanilu alloriarfissamik ujartuillunga. Peqqutit assigiinngitsut nassuiaatigivai, taavalu soorunami tusaatissatut tigullugillu alloriarfissanik ujartuisimavunga, Naalakkersuisut Siulittaasuat Kim Kielsen KNR-imut oqarpoq.

Aamma atuaruk Jeremiassen naalakkersuisunngorpoq

Illuatungiliuuttut Partii Naleraq Inuit Ataqatigiillu Naalakkersuisut taarsikulanerat pissutigalugu aalisarnermik iluarsaaqqinnissaq, 2007-mili aallartinneqartoq, kinguartinneqarnissaat ernummatigaat.

Naalakkersuisulli Siulittaasuat Kim Kielsen eqqissisaavoq, naalakkersuisunngorlaaq Nikolaj Jeremiassen isumalluarfigigamiuk.

- Tassa massakkut Naalakkersuisooqatigiit isumaqatigiissutaat naapertorlugu suliassat assigiinngitsut ingerlassapput. Taannalu nalinginnaasuuvoq, suna tamaat allanngornavianngilaq, siunnerfik ataasiuvoq aamma kiffartuussassagut ataasiupput, taamaammat naalakkersuisoq ivertinneqartoq nalorninani sumut ingerlassanerluni nalunngilaa.

Karl-Kristian Krusep nammineq kissaatigalugu Naalakkersuisunit tunuarumanerata kingunerisaanik, Siumumi parteeqataa, Nikolaj Jeremiassen, Aalisarnermut, Piniarnermut Nunalerinermullu Naalakkersuisunngortinneqarpoq.

Aamma atuaruk Karl Kristian Kruse Naalakkersuisuniit tunualerpoq